Марказий банк тижорат банкларини огоҳлантирди

Марказий банк регулятор сифатида тижорат банкларига хат йўллаб, кредит ёки микроқарз бўйича тўловлар кечикканда қўлланаётган айрим чора ва санкциялар юзасидан эътироз билдирган.

Таҳлиллар натижасида айрим банкларда қуйидаги ҳолатлар аниқлангани айтилган:

• кечиктирилган тўловлар учун ҳисобланадиган фоиз ставкалари шартномада белгиланган йиллик ставкадан бир неча баробар оширилиб, айрим ҳолларда йиллик 150–180 фоизгача чиққани;
• фоиз тўлови кечиктирилганда энг юқори чегараси белгиланмаган кунлик пеня ҳисобланаётгани;
• кредиторнинг ҳақиқий харажатлари билан боғлиқ бўлмаган қўшимча бир марталик жарималар қўлланаётгани.

Марказий банк мижоз тўловни кечиктирганда банклар томонидан қўлланадиган чоралар банк учун “даромад манбаи” эмас, аксинча компенсацион характерга эга бўлиши кераклигини таъкидлаган. Шунингдек, бундай ҳолатларда “адолат ва мутаносиблик” тамойилларига қатъий риоя қилиш зарурлиги қайд этилган.