Миннеаполисда федерал агентлар яна бир кишини отиб қўйди

АҚШ Чегара назорати ходимлари (USBP) шанба куни, Иммиграция ва божхона полицияси (ICE) ходими шоира Рене Гудни ўлдирганидан уч ҳафта ўтмай, Миннеаполисда бир эркакни отиб ўлдирди. Шаҳарда яна намойишлар бошланди.

Расмийлар маълум қилишича, федерал агентлар қурбонига айланган 37 ёшли Алекс Претти АҚШ фуқароси бўлиб, Миннеаполисда яшаган ва фахрийлар учун мўлжалланган маҳаллий шифохонада ишлаган.

АҚШ Ички хавфсизлик вазирлиги (DHS, USBP ва ICE унинг таркибига киради) марҳумнинг қўлида тўппонча бўлгани ва федерал агентлар уни қуролсизлантиришга уринганида у гўёки қаршилик кўрсатганини маълум қилди.

Миннесота штати губернатори Тим Уолз эса воқеа жойидан олинган видеоёзув бу версия бутунлай ёлғонлигини кўрсатмоқда.

«Бу [ноқонуний миграцияга қарши кураш бўйича] операциялар тўхтатилиши учун яна қанча америкалик ҳалок бўлиши ёки жароҳатланиши керак?» – деди Миннеаполис шаҳри мэри Жейкоб Фрей матбуот анжуманида.

АҚШ ички хавфсизлик вазири Кристи Ноэм Фрейни ва Уолзни танқид қилиб, уларни «қонунни бузаётган одамларнинг тарафини олиш»да айблаган.

АҚШ президенти Доналд Трамп Миннеаполис шаҳри ва Миннесот штати раҳбариятини аҳолини «исёнга қўзғаш»да айблади.

Ноэм матбуот анжуманида Алекс Претти федерал агентларга 9-миллиметр калибрли яримавтомат тўппонча кўтариб келганини, шундан кейин зобитлар уни қуролсизлантиришга урингани, у эса «тажовузкор ҳаракатлар қилгани»ни айтган.

Вазирнинг сўзларига кўра, зобитлардан бири ўзининг ва бошқа зобитларнинг ҳаётидан хавфсираб, «ўзини ҳимоя қилиш мақсадида ўт очган».

Миннеаполис полицияси маълумотига кўра, ўлдирилган шахснинг қуролга эгалик қилиш бўйича ҳужжатлари жойида бўлган.

Миннесот штати губернатори Тим Уолз аввалроқ АҚШ президенти Доналд Трампни ICE ва чегара хизматининг Миннесотага ноқонуний иммиграцияга қарши кураш доирасида юборилган минглаб ходимларини олиб кетишга чақирганди.

«Мен бугун тонгда федерал агентлар томонидан содир этилган навбатдаги даҳшатли отишма воқеасидан сўнг Оқ уй билан гаплашдим. Бу ҳолат Миннесотадагиларнинг жонига тегди. Бу жирканч ҳолат. Президент бу операцияни тўхтатиши керак. Минглаб тажовузкор ва ўқитилмаган ходимларни Миннесотадан олиб кетинг. Ҳозироқ», – дея ёзган Уолз X ижтимоий тармоғида.

Ўлдирилган Алекс Претти ҳақида нималар маълум?

Якшанбага ўтар кечаси Миннеаполисда ўлдирилган шахс ҳақидаги маълумотлар тарқала бошлади.

Оила вакиллари Алекс Преттининг қуроли борлигини билишган, аммо у қуролни ўз ёнида олиб юришидан бехабар бўлишган.

37 ёшли Претти Миннеаполисдаги фахрийлар учун шифохонада интенсив терапия бўлимида медбрат бўлиб ишлаган; у Рене Гуд ўлдирилганидан кейин бошланган намойишларга қўшилган.

«У одамлар учун қаттиқ қайғурарди. Миннеаполисда ва бутун Қўшма Штатлардаги миллионлаб одамлар каби ICE билан содир бўлаётган воқеалардан жуда жаҳли чиққанди. У намойишларда иштирок этиш – бошқалар ҳақида қайғуришини намойиш этиш йўли деб ҳисобларди», – дейди унинг отаси Майкл Претти Associated Press агентлигига берган интервюсида.

Отанинг сўзларига кўра, ўғли ота-онасига «тахминан икки ҳафта муқаддам қўнғироқ қилган» ва уларга намойишлар вақтида «ҳеч қандай аҳмоқлик қилмаслик кераклиги»ни билишини айтган.

«Алекс ўзининг оиласи ва дўстлари, шунингдек, у Миннеаполисдаги фахрийлар касалхонасининг интенсив терапия бўлимида медбрат сифатида қараган америкалик фахрийларга чуқур қайғурадиган меҳрибон инсон эди. Алекс бу дунёни яхши томонга ўзгартирмоқчи эди», – дейилади унинг ота-онаси Майкл ва Сюзан Преттининг кейинроқ эълон қилинган баёнотида.

Миннеаполис жанубида, отишма рўй берган Николетт-авеню ва унинг атрофидаги кўчаларда юзлаб намойишчилар йиғилган. Федерал кучишлатар тузилмалар ходимлари уларни кўздан ёш сиздирувчи газ қўллаган ҳолда тарқатиб юборган.

Претти вафот этган жойда ёдгорлик пайдо бўлган.

Миннеаполисда содир бўлган воқеадан кўп ўтмай, ижтимоий тармоқларда камуфляж ва ниқобда бўлган бир неча киши шаҳар кўчаларидан бирида фуқаро кийимидаги шахс билан жанжаллашаётгани, уни ерга йиқитгани, сўнгра улардан бири олти марта ўқ узгани акс этган видео тарқалди: аввалига битта ўқ узилган, бироз танаффусдан кейин сидирғасига бешта ўқ чиққан.

Бир неча ўн метр масофадаги машинадан туриб олинган яна бир видеода воқеа жойи аниқ кўринмайди, аммо у ерга қараб чопаётган ҳарбий кийимли кишиларни кўриш мумкин, кейин эса саккизта ўқ овози эшитилади.

Претти «Америка-Африка оила маркази» ва «Янги Америка тараққиёт маркази» ёзувлари илинган бино олдида отиб ташланган.

Миннесота штатидан сайланган сенатор, Демократик партия аъзоси Эми Клобушар ижтимоий тармоқлар орқали Трамп ва унинг Республикачилар партиясидаги сафдошларига ушбу видеоларни кўришни тавсия қилди, республикачи конгрессменларни эса жим турмасликка ва содир бўлаётган воқеалар юзасидан «ҳамдардлик билдириш» билан чекланишни бас қилишга чақирди.

Трампнинг маслаҳатчиси Стивен Миллер бунга жавобан Клобушарни ва Миннесота раҳбариятини исён қўзғашга уринишда айблади.

«Ички террорчи федерал ҳуқуқ-тартибот органлари ходимларини ўлдиришга уринмоқда – улар эса нима қилмоқда? [...] Сиз ва штатнинг  демократик раҳбарият ягона мақсадда – мамлакатимизга бостириб келган ноқонуний мигрантларни депортация қилишни тўхтатиш учун исён оловини аланга олдиряпсиз», – дея ёзган Миллер ижтимоий тармоқларда.

Доналд Трампнинг ўзи ҳам Truth Social ижтимоий тармоғида шу мазмундаги пост қолдирди.

«Мэр ва губернатор ўзларининг баландпарвоз, хавфли ва сурбетларча риторикаси билан исён қўзғамоқда! […] ICE’даги ватанпарварларимизга ўз ишини қилишга қўйиб беринг. Миннесотада зўравонликка мойил бўлган 12000 хорижлик ноқонуний жиноятчилар қўлга олинди ва олиб кетилди. Агар улар ўша ерда қолишганида, сиз ҳозир гувоҳи бўлаётганингизга қараганда анча ёмон нарсаларни кўрган бўлардингиз!» – дея ёзган Трамп.

Худди шу постда президент ҳеч қандай далил келтирмасдан, Миннесота раҳбариятидаги демократ сиёсатчиларни миллиардлаб доллар маблағ ўғирланишини яширишда, шунингдек, маҳаллий полицияга муҳожирларни ҳибсга олувчи федерал агентларни қўриқлашга имкон бермасликда айблаган.