Marinera танкери денгизчилари Россия ва Қримдаги уйига қайтди

АҚШ ҳарбийлари январ бошида ушлаган Marinera (Bella 1) танкеридан бўлган икки нафар денгизчи уйига — Астрахан ва Россия томонидан қўшиб олинган Қримдаги Керч шаҳрига қайтиб келди. Бу ҳақда якшанба, 1 феврал куни Россиянинг ТАСС ахборот агентлиги улардан бири — керчлик Максим Карпенкога таяниб хабар қилди. Иккинчи қайтган денгизчининг исми хабарда айтилмади.

Карпенко айтишича, кема ушланганидан кейинги 19 кун давомида у яқинлари билан боғлана олмаган, чунки британиялик ва америкалик ҳарбийлар уларнинг алоқа воситаларини олиб қўйган. Ҳозир у ва унга ҳамроҳ бўлган денгизчида “ҳаммаси жойида”, деб таъкидлади у.

28 январ куни Россия ТИВ расмий вакили Мария Захарова ТАССга “Marinera танкеридан икки нафар россиялик денгизчи” озод қилингани ва Россияга йўл олганини билдирган эди.

Декабр охирида АҚШ Қирғоқ қўриқлаш хизмати Кариб денгизида Венесуэла соҳиллари томон йўл олаётган Bella 1 нефт танкерини ушлашга уринган. АҚШда кемани санкцияларни бузгани, Эрон нефтини ташигани ва Венесуэла нефти бўйича “карантин”ни бузгани учун ҳибсга олиш ордери бўлган. Танкер экипажи америкалик ҳарбийларнинг талабларига бўйсунмаган, йўналишни ўзгартирган ва кема борт қисмига Россия байроғини илиб қўйган.

Бир неча кундан сўнг кема Marinera деб қайта номланган ва Россия денгиз регистрига киритилган. “Новая газета. Европа” ёзишича, танкер Қримдан бўлган бир бизнесменга тегишли бўлиши мумкин.

Шундан кейин америкалик ҳарбийлар қувишни давом эттирган. Икки ҳафта давом этган таъқибдан кейин танкер 7 январ куни Шимолий Атлантикада, Шотландия соҳиллари яқинида ушланган. 26 январ куни маҳаллий суд кема капитани ва экипажига нисбатан ҳар қандай ҳаракатларни вақтинча тўхтатиш ҳақида қарор чиқарган. Аммо эртаси куни шотландиялик судя бу қарорни бекор қилган.

28 январ куни АҚШ Қирғоқ қўриқлаш хизмати Marinera капитани — 47 ёшли Гуржистон фуқароси Автандил Каландадзе ва унинг биринчи ёрдамчисини (унинг фуқаролиги аниқланмаган) АҚШга олиб кетгани маълум бўлди.

The New York Times январ бошида ёзишича, Россия ҳокимияти 31 декабр куниёқ кемани қувишни тўхтатишни сўраган. Бироқ Доналд Трамп маъмурияти Қирғоқ қўриқлаш хизмати кемага яқинлашган пайтда у “сохта байроқ” остида сузаётганини билдириб, танкер ҳеч бир давлатга тегишли эмас, деган позицияда қолган.