Бабиш: Европа Украина бўйича Путин билан музокара олиб бориши керак

Европа етакчилари Украинадаги урушни якунлаш шартлари бўйича музокараларда АҚШ президенти Доналд Трамп ва РФ президенти Владимир Путин билан бирга иштирок этиши керак. Бундай фикрни Чехия бош вазири Андрей Бабиш шанба куни, 7 февралда Чехиянинг TN телеканалидаги “Ўн иккига беш дақиқа қолганда” дастурида билдирди.

Бабиш бундай музокараларда иштирок этиши мумкин бўлган шахслар сифатида Германия канцлери Фридрих Мерц, Франция президенти Эммануэл Макрон, Буюк Британия бош вазири Кир Стармер ва Италия ҳукумати раҳбари Жоржа Мелони номларини алоҳида тилга олди. “Энди европалик етакчилар Европага Путин билан ҳам музокара олиб бориш керак, деб гапира бошлади. Аммо олдинроқ, (Венгрия бош вазири — таҳр.) Виктор Орбан Зеленский ва Путин билан учрашганида, буларнинг ҳаммасини қоралашган эди”, — дея эслатди Андрей Бабиш.

Шу билан бирга, у АҚШ президенти Доналд Трамп Москва ва Киев ўртасида тинчлик келишувини тузишга қаратилган музокара жараёнида ҳал қилувчи рол ўйнаётганини таъкидлади: “Трампсиз Европа уддалай олмайди”.

Шу билан бирга, АҚШнинг НАТО аъзолари мудофаа харажатларини ЯИМнинг 5 фоизигача етказиш талаби ҳақида гапирар экан, Андрей Бабиш бунга қарши эканини билдирди. “Трамп кимгадир бақириб юборса, биз эса жим қолиб: ‘Ҳа, биз оширайлик’, деб айтиш мумкин эмас. Мен НАТО йиғилишига борган бўлардим ва буни тушунтиришда менда муаммо бўлмас эди”, — деб келтиради TN телеканали ҳукумат раҳбарининг сўзларини ўз сайтида.

Бундан ташқари, Бабиш эфирда мудофаа соҳасидаги харажатлар бўйича аудит ўтказишни ҳамда ҳарбийларга, хусусан учувчиларга маошни оширишни режалаштираётганини айтди. Шунингдек, у армия сонини кўпайтириш ва унинг жиҳозланишини яхшилаш тарафдори эканини билдирди.