2025 йилнинг ўзида 400 мингга яқин: НАТО Россия йўқотишларини очиқлади

НАТО штаб-квартирасида (Брюссел) 11 феврал, чоршанба куни бўлиб ўтган брифингда алянснинг юқори лавозимли амалдори DW саволига жавобан маълум қилишича, Украинага қарши тўлиқ кўламли бостириб кириш бошланганидан буён Россия тахминан 1,3 млн кишини йўқотган, шундан тахминан 350 минг киши ҳалок бўлган.

Фото: Getty Imagеs

Унинг айтишича, фақат 2025 йилнинг ўзида Россия армиясининг ҳалок бўлганлар ва яраланганлар кўринишидаги йўқотишлари қарийб 400 минг кишини ташкил этган.

НАТОнинг юқори лавозимли вакили Россия йўқотишларида ҳалок бўлганлар билан ярадорлар нисбати ғайриоддий даражада юқорилигини қайд этиб, ўлганлар улуши мутаносиб эмас даражада катта эканини айтди. У буни бир қатор омиллар уйғунлиги билан изоҳлади: дронлар устун бўлган шароитда жанг олиб борилиши, фронтда тиббий таъминот даражасининг пастлиги ва кўп инсон ресурсини талаб қиладиган жанг тактикалари.

Амалдор Украина армиясининг мос йўқотиш рақамларини ошкор қилмади, аммо “ҳозирга қадар бу можарода жами 2,2 млндан ортиқ ҳалок бўлган ва яраланган бор”, деди.

“Демак, агар ҳозир жанг майдонидаги умумий ҳарбийлар сонига қаралса, Россияда улар тахминан 700 минг, Украинада эса 400 минг. Кўриб турганингиздек, еттига тўрт — албатта, энг яхши нисбат эмас, аммо йирик ҳужум учун зарур бўладиган анъанавий ‘учга бир’ нисбатидан ҳам анча узоқ”, — деди Шимолий Атлантика алянси вакили.

“Биз ҳаммамиз биламизки, Украина шахсий таркибни жалб қилиш ва сақлаб қолишда айрим қийинчиликларга дуч келяпти, — дея қўшимча қилди у. — Россия эса фронтга юбориш мумкин бўлган кўпроқ одам ресурсларига ҳали ҳам эга”.

Бошқа бир юқори лавозимли амалдорнинг айтишича, Россияга Бахмутдан Покровск томон 50 километрдан кам масофани босиб ўтиш учун 20 ойдан ортиқ вақт керак бўлган. Бу — кунига 100 метрдан кам дегани ва бу йўлда унинг йўқотишлари 300 минг кишини ташкил этган.

НАТО вакили камида бир ярим йил давомида Донецк вилоятида фронт чизиғининг қулаши кутилмаётганини билдирди. “Шу билан бирга, мен россияликлар 18 ойдан кейин бу ҳудудларни эгаллайди, демаяпман. Фақат шароитлар узоқроқ келажак учун прогноз беришга имкон бермаяпти”, — деб аниқлик киритди у.

12 феврал куни Брюсселда НАТОга аъзо давлатлар мудофаа вазирлари йиғини, шунингдек НАТО–Украина кенгаши учрашуви ва “Рамштайн” форматида Украина бўйича алоқа гуруҳи мажлиси бўлиб ўтади.