Ўзбекистон 2025 йилда Тожикистон кўмирининг деярли барча экспорт ҳажмини сотиб олди

Тожикистон хорижга 558,7 минг тонна кўмир етказиб берди, унинг 99,91 фоизини Ўзбекистон сотиб олди.

Фото: Asia-Plus

Тожикистонда 2025 йилда 2,8 миллион тоннадан ортиқ кўмир қазиб олинди. Бу 2024 йилга нисбатан 235 минг тонна ёки 10 фоизга кўпдир. Бу ҳақда Тожикистон саноат ва янги технологиялар вазири Шерали Кабир Душанбеда бўлиб ўтган матбуот анжуманида маълум қилди.

Кўмир экспорти ошгани қайд этилди: Тожикистон хорижга 558,7 минг тонна кўмир етказиб берди, бу 2024 йилга нисбатан 42 фоизга кўпдир. Асосий харидор Ўзбекистон бўлди, у умумий ҳажмнинг 99,91 фоизини, яъни 558,2 минг тоннани сотиб олди. Афғонистон атиги 474 тонна кўмир олди.

Тожикистон ичида 2,27 миллион тонна кўмир сотилган, шундан 800 минг тоннаси Душанбедаги 2-ИЭСга етказиб берилган. 451 минг тоннага яқини аҳолига сотилган.

Қайд этилишича, яқин йилларда янги кўмир корхоналарини қуриш режалаштирилган. Кўмир саноатига инвестицияларни жалб қилиш ва ишлаб чиқариш қувватларини ривожлантириш бўйича Россия, Хитой, Европа Иттифоқи мамлакатлари ва Ўзбекистон компаниялари билан иш олиб борилмоқда.