Хизмат уйида нарколаборатория ташкил қилган профилактика инспектори 12 йилга қамалди

Жиноят ишлари бўйича Олмазор туман судида судя Алишер Турғунов раислигида профилактика инспектори хизмат уйида нарколаборатория ташкил қилганига оид жиноят иши кўриб чиқилди.

“Закладчик”дан нарколабараториягача

Тергов материалларига кўра, 1995 йилда туғилган Б.Т. 2019 йил декабридан Олмазор тумани ИИО ФМБ 1-сон ИИБ профилактика инспектори, 2023 йилдан Олмазор туманидаги “Шон-шуҳрат” МФЙ профилактика инспектори вазифасида ишлаб келган.

Профилактика инспектори 2025 йил апрел ойида Марказий Осиё давлатлари, жумладан Ўзбекистон ҳудудида Telegram орқали синтетик гиёҳвандлик воситалари савдоси билан шуғулланувчи профил эгасига “закладчик” сифатида ёлланган. У 2025 йил сентябрга қадар ушбу профил эгасининг топшириғига асосан синтетик гиёҳвандлик моддаларини қабул қилиб, уларни кичик бўлакларга қайта қадоқлаган ҳолда “закладка” кўринишида тарқатиш билан шуғулланган. “Участкавой” ўз “хизмат ҳақини” криптовалютада олиб келган.

Б.Т. 2025 йил август ойи бошида профил эгасининг кўрсатмасига асосан турли синтетик гиёҳвандлик моддаларини қўлбола усулда ишлаб чиқаришга мўлжалланган лаборатория ташкил этишни режалаштирган. Ушбу режага асосан у атрофдагиларда шубҳа уйғотмаслик ҳамда хизмат жойидан узоқлашмаслик мақсадида нарколабораторияни ўз хизмат уйида ташкил этган. Сўнгра онлайн йўриқномага асосан лабораторияда турли асбоб-ускуналар ва бошқа воситалардан фойдаланган ҳолда мефедрон синтетик гиёҳвандлик моддасини тайёрлаган.

Шу тариқа ходим ўзи тайёрлаган гиёҳвандлик воситасини “закладка” усулида яшириб, шартли манзил сурати ва локациясини профил эгасига жўнатиб келган. Бунинг эвазига ҳар бир “закладка” учун крипто-актив кўринишида 1 500 (бир минг беш юз) доллар ҳақ олган.

Профилактика инспектори 2025 йил 27 июлдан 27 сентябрга қадар ўз крипто-ҳамёнига 10 831 доллар қабул қилган ҳамда 10 112 доллар ўтказиш билан боғлиқ операцияларни амалга оширган. Шу тариқа у крипто-активлар айланмаси соҳасидаги қонунчиликни ҳам бузган.

“Участкавой”нинг ушланиши

2025 йил 27 сентябр куни Давлат хавфсизлик хизмати ҳамда Божхона қўмитаси ходимлари ҳамкорлигида тезкор тадбир ўтказилган. Унда олдиндан тезкор кузатувга олинган Б.Т. хизмат уйидан чиққан вақтда тўхтатилиб, хизмат уйи холислар иштирокида кўздан кечирилган.

Тинтувда турли синтетик гиёҳвандлик моддаларини тайёрлаш ва қадоқлаш учун мўлжалланган 335 дона асбоб-ускуналар топилган. Шунингдек, хонадондан 10,5 кг “Алфа-ПВП” ва 4 гр “Спайс” синтетик наркотиклари, шунингдек, гиёҳвандлик моддаларини тайёрлашда фойдаланиладиган 588 гр суюқлик топилиб, ашёвий далил сифатида расмийлаштирилиб олинган.

Тезкор тадбир давом эттирилиб, профилактика инспекторининг Тошкент туманидаги доимий яшаш хонадони ҳам текширилган. Хонадонда ерга кўмиб, яшириб қўйилган тахминий оғирлиги 430 гр бўлган “Алфа-ПВП” наркотик моддаси борлиги ҳам аниқланган.

“Осон пул топмоқчи эдим”

Б.Т. содир қилган жиноий ҳаракатларидан чин кўнгилдан пушаймон эканини, ушбу қилмишларни осон пул топиш илинжида содир қилганини билдирган.

“2025 йил апрел ойида Instagram’да “грузо-перевозка, зарплата 1000 долларов” номли эълонга кўзим тушиб қолди. Ушбу эълон менда қизиқиш уйғотди. Сабаби, институтни транспортда юк ташиш ва логистика йўналишида тамомлаганман. Эълон остида қолдирилган Telegram профилга кирганимда у ерда бот орқали иш юзасидан турли саволларга жавоб берилаётганини кўрдим.

Ўша вақтда Spark машинам бўлган. Ушбу машина ижара асосида олинганди ва мен унинг тўловига қийналаётгандим. Шу сабабли, айнан институтда ўқиган мутахассислигим бўйича қўшимча иш излагандим”, деган у терговдаги кўрсатмасида.

Шу тариқа профилактика инспекторига Telegram орқали “Аристон” номли профил эгаси алоқага чиққан. Турли савол-жавоблардан кейин профил эгаси бир нечта топшириқ берган ҳолда “участкавой”ни синаб кўрган. Бироқ бу “закладка”ларда наркотик модда эмас, турли буюмлар бўлган. Профилактика инспектори ишончни оқлагач, унга “Михаил Палович” номли профил эгаси алоқага чиққан ва ҳақиқий наркожиноят шу нуқтадан бошланган.

“2025 йил апрел ойидан июл ойи бошига қадар “Михаил Палович” номли аккаунт фойдаланувчисининг топшириқларига асосан Янгийўл, Ўрта Чирчиқ ва Бектемир туманлари ҳудудидаги турли манзилларга яшириб кетилган мефедрон гиёҳвандлик воситасини олиб, уларни Тошкент шаҳри ҳудудига яшириб келганман. Ўзим томонимдан ҳар бир етказилган гиёҳвандлик воситаси учун 100-150 АҚШ доллари миқдоридаги пул маблағларини крипто-актив кўринишида крипто-ҳамёнимга қабул қилиб олганман.

2025 йил июл ойи ўрталарига келиб “Михаил Палович” номли аккаунт фойдаланувчиси менга алоқага чиқди. У Сим-карта яширилган жойнинг геолокациясини юборди ва уни олиб, телефонга ўрнатишим кераклиги ҳақида топшириқ берди. Мен топшириқни бажардим. Орадан бироз вақт ўтиб, қўнғироқ бўлди ва қўнғироқ қилган шахс менга почта жўнатмаси борлигини айтди. Мен у билан Тошкент шаҳридаги автовокзал яқинида кўришиб, ундан ҳажми катта бўлган усти полиэтилен пакет билан ўралган қутини қабул қилиб олдим. У Қозоғистон давлат рақам белгиси тақилган Газел юк машинасида эди.

Қабул қилиб олган қутимни Тошкент вилояти ҳудудига олиб чиқиб, йўл четидаги дала майдонига яширдим ҳамда унинг фотосурати ва геолокациясини “Михаил Палович”га юбордим. Бунинг эвазига 500 АҚШ доллари миқдоридаги криптовалюта олдим.

Бу ҳолат яна бир неча бор такрорланди. Ушбу ҳолатларда ҳам катта ҳажмдаги қутиларни асосан Тошкент шаҳридаги автовокзал яқинида турли ҳайдовчилардан қабул қилиб олиб, Тошкент вилояти ҳудудида яшириб келганман.

2025 йил август ойи бошида навбатдаги топшириққа асосан Тошкент шаҳри автовокзали яқинида қутини қабул қилдим. “Михаил Палович” номли профил эгаси почтани қабул қилувчи тайёр эмаслигини айтиб, қутини ишончли жойга яшириб қўйишим ҳақида топшириқ берди. Қути ичида гиёҳвандлик воситаларига алоқадор бўлган нарсалар бўлганини тушуниб, уни яшаш манзилимга олиб боришдан қўрқдим ва хизмат уйига яширишга қарор қилдим.

Ушбу воқеадан бир кун ўтиб, “Михаил Палович” номли профил эгаси менга алоқага чиқди ва почтани қабул қилиб олишга одам йўқлигини, қутида гиёҳвандлик воситасининг суюлтирилган кўриниши мавжуд эканини, уни уй шароитида қуритиб, тайёр гиёҳвандлик воситасига келтириш кераклигини, агарда бу ишни қилишга рози бўлсам, 500 доллар хизмат ҳаққимга яна 1 000 доллар қўшиб беришини маълум қилди. Мен унинг таклифини рад этиб, гиёҳвандлик воситасини қуритишни билмаслигимни айтдим. У суюлтирилган кўринишдаги гиёҳвандлик воситасини ўз вақтида қуритмаса, таркиби бузилиши мумкинлигини, агар уни ўз вақтида қуритмасам пулини тўлаш менинг зиммамга тушишини айтди. Ушбу вазиятда нима қилишни билмасдан, унинг талабини бажаришга мажбур бўлдим”, деган профилактика инспектори терговдаги кўрсатмаларида.

Сўнгра “участкавой”га гиёҳвандлик воситасини қуритиш учун керакли бўлган анжомлар етказилган. У эса 10-15 кун вақт мобайнида тахминан 3 кг гиёҳвандлик воситасини қуритиб, “закладка” усулида тарқатган.

Ушбу воқеадан кейин профилактика инспектори ўз қилмишидан қўрқа бошлаган. Чунки юқоридаги ҳаракатлардан сўнг унинг хизмат уйи нарколаборатория кўринишига келиб қолганди. Шу сабабли у жиноий ҳаракатлари фош бўлишидан хавотирга туша бошлаган. Сўнгра 2025 йил август ойи ўрталарида “Михаил Палович” номли профил эгасига у билан бошқа ишламаслигини айтган. Аммо 2025 йил сентябр ойи ўрталарига келиб, “Михаил Палович” профилактика инспекторига яна алоқага чиқиб, агар юқоридаги фаолият билан шуғулланишда давом этмаса жиноий қилмишларини фош қилишини айтган. Бу таҳдиддан қўрққан “участкавой” ишлашни давом эттиришга рози бўлган. 2025 йил 27 сентябр куни эса қўлга олинган.

Жазо

Суд ҳукми билан Б.Т. Жиноят кодексининг 25,273-моддаси 5-қисми (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) ҳамда 278-8-моддаси (крипто-активлар айланмаси соҳасидаги қонунчиликни бузиш) 3-қисми “а” бандида назарда тутилган жиноятларни содир қилишда айбли деб топилди. Унга 12 йил муддатга озодликдан маҳрум қилиш жазоси тайинланди.