Чехия шаҳарларида президент Павелни қўллаб-қувватлаш митинглари бўлиб ўтди

Чехияда минглаб одамлар 15 феврал, якшанба куни 400 дан ортиқ аҳоли пунктларида кўчаларга чиқиб, либерал ва ғарб тарафдори бўлган президент Петр Павелни қўллаб-қувватлашини билдирди. Бу чиқишлар Павел билан ҳукумат раҳбари — ўнг популист ва евроскептик Андрей Бабиш ўртасидаги кескинлашган можаро фонида бўлиб ўтди.

Чехиянинг CTK ахборот агентлиги хабар беришича, акцияга “Демократия учун миллион лаҳза” ташаббуси чақирган. Шу маълумотларга кўра, Чехияда аҳолиси бўйича иккинчи ўринда турадиган Брно шаҳрида намойишга 8000 дан 10 000 нафаргача одам чиққан.

Акциялар Острава (Чехияда аҳолиси бўйича учинчи шаҳар), Пардубице, Карлови Вари каби шаҳарларда ҳам ўтказилган. Айрим иштирокчилар ўзлари билан Павелнинг портретларини олиб чиққан. Бошқалар эса ҳукумат аъзоларининг устидан чизиб қўйилган тасвирлари туширилган плакатларни ушлаб турган.

1 феврал куни Павелни қўллаб-қувватлаш бўйича кўп минг кишилик митинг Прагада бўлиб ўтган эди. Ташкилотчилар баҳосига кўра, унда 90 минг нафаргача одам қатнашган. Кейинги митингни Прагада 21 март куни ўтказиш режалаштирилган.

Павел билан Бабиш ўртасидаги можаро президентнинг “Автомобилистлар ўзлари учун” партиясининг фахрий раиси Филип Турекни атроф-муҳит вазири этиб тайинлашдан бош тортганидан кейин авж олган. Павел бу қарорини Турекнинг аввал айтган айрим баёнотлари, унинг фикрича, демократик давлатда вазир лавозимига мос келмаслиги билан изоҳлаган. 

Президент, шунингдек, Турекнинг партиядоши бўлган ташқи ишлар вазири Петр Мацинкани мазкур тайинлов масаласида унга босим ўтказишга уриниш ва амалда шантаж қилишда омма олдида айблаган. Павелни ҳозир мухолифатда бўлган партиялар вакиллари қўллаб-қувватлаган.