«Дамингни ол, дўстим» – Жапаров Ташиев билан учрашганини айтди

Қирғизистон Миллий хавфсизлик давлат қўмитасининг собиқ раҳбари Қамчибек Ташиев давлат лавозимига қайтмайди. Бу ҳақда президент Садир Жапаров маҳаллий «Хабар» миллий ахборот агентлигига берган интервюсида айтиб ўтган.

Журналист унга жамоатчилик фаоллари, сиёсатчилар ҳамда оқсоқоллар «мамлакат келажаги учун Жапаров ва Ташиев тандеми тикланиши кераклиги»ни айтаётгани, унинг ўзи ҳам охирги интервюсида «Ташиев билан дўст бўлиб қолиши» ҳақида гапирганини эслатиб, бу борадаги позицияси қанчалик ўзгаргани ҳақида сўраган.

«Ҳа, мен ҳали ҳам шу позициядаман. Мен табиатан баҳсли масалаларни тинч ва зиддиятларсиз ҳал қилишни маъқул кўраман. Биз дўст бўлиб қоламиз. Аммо бу одам давлат лавозимида ишламайди. Дам олсин, соғлиғига қарасин.

Атрофини тозаласин, „оқсоқоллар ва кўксоқоллар“дан халос бўлсин.

Тергов органлари ҳаммасини аниқлаб, тартиб ўрнатади. Албатта, ҳозир у раҳмат демайди. Хафа бўлади. Аммо йиллар ўтиб „Дўстим, ўшанда тўғри қилган экансан“ дейди ва миннатдорчилик билдиради», – дейди Жапаров.

Президентнинг аниқлик киритишича, у шу кунларда Ташиевни қабул қилган, МХДҚнинг собиқ раиси эса «муддатидан олдинги сайловлар масаласини кўтарган оқсоқоллар билан учрашмагани»ни айтган.

«Кеча кечқурун уни қабул қилдим. „Дамингни ол, дўстим, соғлик билан шуғуллан, хотиржам яша“, дедим.

Дўстимнинг айтишича, у ҳеч қандай „оқсоқол“ ёки „кўксоқол“лар билан гаплашмаган.

Шундан келиб чиқиб, хулоса қилдим: демак, улар ўзларича, яширинча, ўзларининг яширин режаси бўйича, дўстимга билдирмай ҳаракат қилишган.

Ҳаммасини тозалаб, тартибга келтирамиз. Худога шукр, бунга кучимиз етади», – деган Жапаров.

Интервю давомида журналист жамоатчиликда Ташиев кетганидан кейин Қирғизистондаги уюшган жиноий гуруҳлар ҳамда коррупцияга қарши кураш тўхташи, жиноятчилик кучайиши борасида хавотирлар пайдо бўлганига эътибор қаратган.

Бунга жавобан Жапаров мамлакатда ҳозирда уюшган жиноятчилик йўқлиги ва бундан кейин ҳам бўлмаслигини таъкидлаган.

У ҳуқуқ-тартибот идораларига жиноятчилик ва коррупцияга қарши курашда «ниқоб-шоу» ва пиарсиз, хотиржам ва профессионал тарзда ишлаш бўйича топшириқ берган.

«Албатта, жиноятчилик бўлади, жиноятчилар бутун дунёда бор. Уларни ҳеч ким охиригача йўқ қила олмайди. Одам яшайдиган жойда ҳаммаси бўлади.

Жиноятлар бўлади, лекин аввалгидек бозорларни назорат қиладиган гуруҳлар йўқ. Бундай одамларнинг ҳаммаси ё қамоқда, ё чет элда

Лекин аввалгидек уюшган жиноий гуруҳлар, бозорларда аёллардан ҳам пул йиғадиганлар энди бўлмайди.

Уларнинг барчаси ҳозир ёки озодликдан маҳрум этилган ёки хорижда яширинган. Агар криминал яна Қирғизистонга қайтиш ва бу ерда ўзининг ўғрича қонунларини ўрнатиш ҳақида ўйлаётган бўлса, улар адашади.

Қирғизистон – ҳозир бошқа Қирғизистон. Мамлакатни 2020 йилгача ва 2020 йилдан кейинги даврга ажратиш керак. 2020 йилдан кейинги ҳокимият улар билан тил бириктирмайдиган ҳокимиятдир. Шунинг учун энди уюшган жиноятчилик бўлмайди.

Коррупцияга қарши кураш эса ҳеч қачон тўхтамайди. У бир умр давом этади. Дунёда коррупцияни таг-томири билан йўқ қилдик, деб айта оладиган бирорта давлат йўқ. Ҳатто коррупциясиз давлат ҳисобланган Сингапурда ҳам бу кўрсаткич 15-16 фоизни ташкил этади.

„Бизда коррупция йўқ, ҳаммасини йўқ қилдик“, деб пиар қилиш керак эмас. Коррупция ҳеч қачон бутунлай йўқолмайди. Унинг иқтисодий, сиёсий, уруғ-аймоқчилик ва бошқа турлари мавжуд. Биз унга қарши курашиш ва даражасини пасайтириш учун барча саъй-ҳаракатларни амалга оширмоқдамиз.

Жиноятчилик билан курашиш қийин бўлмади, бир кунда тартиб ўрнатдик. Лекин охирги беш йилда коррупцияни тўлиқ енгиб бўлмаяпти. Худо хоҳласа, келгусида унинг даражасини имкон қадар пасайтиришга ҳаракат қиламиз.

Бунга куч ҳам, ақл ҳам етади. Мен ҳуқуқни муҳофаза қилиш органларига топшириқ бердим: „Жиноятчилик ва коррупцияга қарши курашда сизларда яшил чироқ бор, фақат „маска-шоу“сиз, пиарсиз, хотиржам ва профессионал тарзда ишланг“».