Rheinmetall раҳбари 2026 йилда Украинада тинчлик бўлишини кутмаяпти

Немис мудофаа концерни Rheinmetall бош директори Армин Паппергер Украинадаги уруш 2026 йилда ҳам тугамайди, деб ҳисоблайди. У бу фикрни берлиндаги Table.Today платформасининг подкастида айтган, подкаст 16 феврал, душанба куни эълон қилинган.

Паппергер ўз позициясини “Россия урушни тугатишдан манфаатдор эмас”, деган далил билан изоҳлади. Шу муносабат билан у Украинага кейинги ёрдам зарурлигини таъкидлаб, компанияси Киевга қўшимча ҳарбий техника етказиб беришга тайёр эканини билдирди.

“Биз кўп соҳаларда ёрдам бера оламиз. Айни пайтда биз шартномаларда кўзда тутилган ҳажмдан ҳам кўпроқ ўқ-дорилар ишлаб чиқаряпмиз”, — деди Паппергер. У шуни ҳам қўшимча қилди: “Айрим жойларда бу ишлаб чиқариш учун молиялаштириш ҳали таъминланмаган”. Rheinmetall раҳбарининг айтишича, концерн Украинага янада кўпроқ “ҲҲМ қуроллари, ўқ-дорилар ва ҳатто кўпроқ танклар” етказиб беришга тайёр.

Стокҳолм халқаро тинчлик муаммоларини ўрганиш институти (SIPRI) ҳисоботига кўра, 2024 йил якунлари бўйича дунёдаги энг йирик 100 та мудофаа компаниясининг қурол-яроғ ва ҳарбий хизматлар сотувидан тушган даромади 5,9 фоизга ўсиб, рекорд даража — 679 млрд долларга етган. Муаллифлар буни, жумладан, Россиянинг Украинага қарши давом этаётган уруши билан ҳам изоҳлайди.

Германиядаги қурол ишлаб чиқарувчилар 2024 йилда тушум ўсиши бўйича энг юқори кўрсаткичлардан бирини намоён қилди — 36 фоизга. Бу кўрсаткич Японияда тезроқ ўсган — 40 фоизга. Тўртта немис компанияси жаҳоннинг топ-100 рўйхатига кирган бўлиб, улар орасида етакчи айнан Rheinmetall бўлди. Ҳарбий савдолардан тушган 8,2 млрд евро тушум (бир йилда +47 фоиз) билан у умумий рўйхатда 20-ўринни эгаллади.