Путин бизнесдан туғилишни оширишда фаол иштирокни талаб қилди

Россия президенти Владимир Путин иш берувчиларни мамлакатдаги демографик вазиятни яхшилашда ҳал қилувчи рол ўйнашга чақирди. Унинг айтишича, бизнес ходимларни “катта, кўп болали оила қуриш”га рағбатлантириши керак.

Фото: Комсомольская Правда / Global Look Press

Путин пайшанба куни, 19 февралда, Стратегик ташаббуслар агентлиги кузатув кенгаши йиғилишида сўзлар экан, шуларни таъкидлади. У ҳукумат томонидан яқинда тасдиқланган “Бизнеснинг жамоат капитали стандарти”да ходимларнинг олти ёшгача бўлган болалари сони ҳисобга олинишини эслатди. Иқтисодий тараққиёт вазирлиги маълумотига кўра, мазкур ҳужжат компанияларнинг жамият фаровонлигига реал таъсирини баҳолаш имконини беради.

РФ ҳокимияти ушбу ҳужжатда белгиланган кўрсаткичлардан давлат қўллаб-қувватлови тўғрисида қарорлар қабул қилишда фойдаланмоқчи. “Бу давлатга узоқ муддатли миллий устувор мақсадлар учун ишлаётганларни кўриш ва улар билан барқарор шерикликлар йўлга қўйиш имконини беради”, — деб тушунтирди агентлик бош директори Светлана Чупшева.

“Бизнеснинг жамоат капитали стандарти”да “ижтимоий масъулиятли” бизнесни белгилайдиган 95 та кўрсаткич бор. Улар қаторида — бир ходим ҳисобига ўртача болалар сони, кўп болали ота-оналар улуши ва рўйхатдан ўтган никоҳда турган ходимлар сони каби кўрсаткичлар мавжуд.

Алоҳида тарзда “анъанавий маънавий-ахлоқий ва маданий-тарихий қадриятлар”ни шакллантиришга қаратилган лойиҳаларга қилинган харажатлар ҳам ҳисобга олинади. Рўйхатга, шунингдек, “урушлар фахрийси” бўлган ходимлар сони ва волонтёрлик фаолиятига сарф-харажатлар ҳам киритилган. Стандарт ғояси Путин томонидан демографик инқирозга жавоб чораси сифатида 2024 йил май ойида эълон қилинган эди.

Бу ташаббус Россияда туғилиш кескин камайган бир пайтда амалга оширилмоқда. Охирги очиқ маълумотларга кўра, 2024 йилда РФда 1,222 млн бола туғилган — бу 1999 йилдан бери энг паст кўрсаткич. 2025 йилнинг биринчи чорагида эса XVIII–XIX асрлар чегарасидан бери энг паст натижа (288 минг бола) қайд этилган, шундан кейин Росстат жорий статистикани махфийлаштириб қўйган.

2025 йил якунлари бўйича умумий туғилиш коэффициенти 1,374 гача тушган (бир йил олдин — 1,4), бу 2006 йилдан бери энг паст кўрсаткич бўлди. Қулаш кетма-кет ўн йилдан бери қайд этилмоқда. Ҳокимият кўп болалиликка йўналиш беришга чақириб келаётганига қарамасдан, декабр ойида учинчи ва ундан кейинги бола туғилиши коэффициенти Россиянинг Украинага қарши уруши бошланишидан олдинги даражадан ҳам пастга тушиб кетган.