Словакия Киевга электр энергиясини фавқулодда етказиб беришни тўхтатмоқда

Агар Украина энергетика тармоғини барқарорлаштириш учун Словакиядан ёрдам сўраса, бу ёрдамни олмайди, деди Словакия бош вазири Роберт Фицо. Унинг сўзларига кўра, бу қарор “Дружба” қувури орқали Россия нефти транзити тўхтатилганига жавоб чорасидир.

Фото: REUTERS / Gleb Garanich

Украина томонидан “Дружба” нефт қувури орқали Россия нефти транзитини тўхтатиш атрофидаги можаро фонида, Словакия Киевга фавқулодда электр энергияси етказиб беришни тўхтатмоқда. «Бугундан бошлаб, агар Украина томони Словакияга Украина энергетика тармоғини барқарорлаштиришда ёрдам сўраб мурожаат қилса, бундай ёрдамни олмайди», — деди душанба, 23 феврал куни мамлакат бош вазири Роберт Фицо.

Унинг айтишича, у миллий энергетика тармоқ операторига “Дружба” қувури орқали нефт транзити қайта тикланмагунча Украинага фавқулодда электр етказиб беришни тўхтатишни топширган. Фицо, шунингдек, қарор қабул қилиш арафасида Украина президенти Володимир Зеленский билан телефон орқали гаплашишга уриниб кўрганини айтган. Унинг таъкидлашича, Украина томони суҳбатга фақат 25 февралдан кейин тайёр эканини билдирган.

«Вазиятнинг жиддийлигини ва Словакияда нефт соҳасида фавқулодда ҳолат эълон қилинганини ҳисобга олган ҳолда, бу шароитда биз дарҳол биринчи жавоб чорасини қўллашга мажбурмиз. У нефт транзити Словакияга қайта тикланиши биланоқ бекор қилинади. Акс ҳолда, биз кейинги жавоб чораларига ўтамиз», — деди Словакия ҳукумати раҳбари.

“Дружба” қувури орқали Россия нефти Украина ҳудудидан ўтиб Словакия ва Венгрияга етиб боради. Украина томони маълумотига кўра, етказиб беришлар январ ойи охиридан буён Россия томонидан қилинган бомбардимонлар сабаб узилган. Шу билан бирга, Будапешт ва Братислава Украина раҳбариятини транзитни қайта тиклашга атайлаб тўсқинлик қилаётганликда айбламоқда. Ҳар икки мамлакат ҳам ҳалигача катта даражада Россия нефтига боғлиқ.

Аввалроқ Венгрия ҳам Европа Иттифоқининг Украинага кейинги ёрдамини блоклаш билан таҳдид қилган ва нефт оқими тўхтатилишини Киев томонидан қилинган «ҳеч қандай сабабсиз душманлик ҳаракати» деб атаган. 23 феврал куни Венгрия Россияга қарши 20-санкциялар пакетига вето қўйган. Мамлакат ташқи ишлар вазири Петер Сийярто маълум қилишича, бу чоралар, жумладан, “Дружба” қувури орқали нефт етказиб бериш тўхтатилгани билан ҳам боғлиқ.