Украина дронлари учун “иккинчи контур”: ишлаб чиқариш Британияга кенгайди

Буюк Британия ҳудудида зарб берувчи учувчисиз аппаратлар (дронлар) ишлаб чиқарадиган биринчи украин заводи иш бошлади. Бу ҳақда Украинанинг элчиси, Украина Қуролли кучлари собиқ бош қўмондони Валерий Залужний чоршанба, 25 феврал куни хабар қилди. Унинг Telegram’даги ёзувига кўра, ишлаб чиқариш мажмуаси Ukrspecsystems компаниясига тегишли бўлиб, у “дронлари юқори технологик уруш шароитида ўз самарадорлигини анча олдин исботлаган” компания сифатида таърифланган.

Залужнийнинг аниқлаштиришича, компаниянинг муҳандислик маркази Украинада қолади, ишлаб чиқариш линиялари эса Буюк Британияга кўчирилади.

“Буюк Британияда ишлаб чиқаришни йўлга қўйиш чуқур стратегик мантиққа эга. Бу оғирлик марказини Украинадан кўчириш эмас. Бу умумий имкониятларимизни кенгайтириш ва ишлаб чиқариш узлуксизлигини кафолатлайдиган барқарорликнинг иккинчи контурини яратишдир”, — деб таъкидлади Украина элчиси. У, шунингдек, “Украина доимий ракета зарбалари, инфратузилманинг вайрон бўлиши ва ишлаб чиқаришлар учун таҳдидлар шароитида жанг қилаётганини” эслатди.

Залужний қўшимча қилишича, шу йўл билан “иттифоқчилар фақат бир-бирини қўллаб-қувватлабгина қолмай, балки хавфсизлик учун умумий саноат базасини ҳам шакллантирмоқда”. Собиқ бош қўмондон сўзларига кўра, Украина учун бу қўшма корхона “барқарорлик ва узоқ муддатли режалаштириш имконияти”ни англатади, Буюк Британия учун эса — янги иш ўринлари ва реал жанг ҳаракатларида синовдан ўтган технологияларга кириш орқали ўз мудофаа саноатини кучайтиришдир.

Украина ва Буюк Британия ўртасида қўшма ишлаб чиқариш бўйича келишувга эришилганини Украина президенти Володимир Зеленский 2025 йил июн охирида, Британия бош вазири Кир Стармер билан учрашув якунларига кўра маълум қилган эди. Украина президентининг айтишича, бундай ҳамкорлик Украинага “муҳим лойиҳалар учун барқарор молиялаштириш” олишга ёрдам беради, энг аввало — дрон-тутувчилар ва зарб берувчи дронлар ишлаб чиқаришда.

Буюк Британиядаги Украина элчиси Валерий Залужний 18 феврал куни AP агентлигига берган интервюсида илк бор омма олдида Украина президенти Володимир Зеленский билан муносабатларидаги чуқур бўлиниш ҳақида гапирган. Собиқ бош қўмондоннинг айтишича, кескинлик 2022 йил феврал ойида Россиянинг тўлиқ кўламли босқини бошланганидан кўп ўтмай пайдо бўлган ва мамлакат мудофааси усуллари билан боғлиқ бўлган, кейин эса можаро кескинлашган.

2024 йил феврал ойида Зеленский Залужнийни лавозимидан озод қилиб, уни Лондонга элчи этиб юборган. Таҳлилчилар буни президентнинг ўз сиёсий рақобатчисини четлатишга уриниши сифатида баҳолаган. Сўровлар гипотетик президентлик пойгасида Залужний Зеленскийни ортда қолдиришини (23 фоизга қарши 20 фоиз) кўрсатмоқда, бироқ генерал уруш тугагунига қадар сиёсий амбицияларни муҳокама қилишдан бош тортмоқда.