Қозоғистонда «Первый» ва бошқа Россия телеканаллари намойиши тўхтатилди

Кўрсатилган сабаб – телеканаллар томонидан эфирга узатиш учун берилган вақтинчалик рухсатноманинг амал қилиш муддати тугаганлиги.

Фото: Олег Яковлев / РБК

Баҳор бошидан бери Қозоғистондаги пуллик телевидение операторларидан бири - «Alma TV» томошабинлари баъзи телеканаллар эфирининг тўхтаганига дуч келди.

Orda.kz нашрининг аниқлашича, 2026 йил 28 февралдан бошлаб, компания Россиянинг баъзи телеканаллари ретрансляциясини тўхтатган. Жумладан: «Первый канал. Всемирная сеть», «Музыка первого», «Победа», «Телекафе» ва бошқалар. Кўрсатилган сабаб - ҳуқуқ эгасидан эфирга узатишга берилган вақтинчалик рухсатноманинг амал қилиш муддати тугаганлиги.

Компания берган маълумотга кўра, ҳамкорликни қайта тиклаш учун хорижий телеканаллар вакилларидан жавоб кутилмоқда.

Нашрнинг қайд қилишича, бошқа операторларнинг эфир тармоқларидан «Первый», НТВ ва бошқа каналлар ҳам ғойиб бўлган.