Виговский 7 октябр оқшомида эълон қилган маълумотга кўра, қутқарувчилар ва полиция ходимлари вайроналар остидан, шикастланган бинолардан ҳамда ёнғинлардан жами 29 кишини қутқарган.
Украина президенти Володимир Зеленский шу куни кечқурун ҳужумлар оқибатида 100 киши жароҳатланганини маълум қилган. Унинг сўзларига кўра, Россия баллистик ва қанотли ракеталар ҳамда «Шаҳед» дронларини қўллаган. Кундузи ҳам дронлар ва авиабомбалар билан янги зарбалар берилган.
Энг оғир оқибатлар Черниҳив вилоятининг Прилуки шаҳрида қайд этилган. Бу ерда ракета кўп квартирали турар жой биносига тушган. Ички ишлар вазири маълумотига кўра, ҳалок бўлган беш боланинг уч нафари бир ёшда бўлган.
Вазир хабар берган пайтда Прилукида вайроналарни тозалаш ва қидирув-қутқарув ишлари 14 соатдан ортиқ давом этаётган эди. Черниҳив вилояти ҳарбий маъмурияти раҳбари Вячеслав Чаус аввалроқ шаҳарда 50 дан зиёд киши жабрланганини билдирган.
Зеленскийнинг айтишича, 7 октябрда Украинадаги 13 ҳудуд ҳужумга учраган. Россия қўшинлари 70 та ракета, шунингдек, зарбадор дронларни қўллаган.
Украина президенти халқаро етакчиларни ҳужумларга муносабат билдиришга чақирган. У Россияга нисбатан санкцияларни юмшатиш ёки айрим олигархлардан чекловларни олиб ташлаш ҳақидаги сигналларни танқид қилган.
Зеленскийнинг фикрича, Россиянинг нефт сотишдан даромад олишда давом этаётгани урушни молиялаштириш имконини сақлаб қолмоқда. У буни Украина билан бирга Европа ва Ғарб мамлакатлари учун ҳам муаммо деб баҳолаган.
Қурбонлар ва жароҳатланганлар ҳақидаги рақамлар Украина расмийларининг 7 октябр кечқурунги баёнотларига асосланган.
