Австралия эронлик беш нафар футболчи қизга бошпана бермоқда

Австралияда ўтган халқаро турнирда эронлик футболчи қизлар миллий мадҳияни куйлашдан бош тортди. Уларнинг беш нафари бошпана сўради ва Австралия ҳукумат идоралари уларни ҳимоя остига олди.

Фото: Getty Imagеs

Ватанида миллий мадҳияни куйлашдан бош тортгани учун таъқибга учраш хавфи остида қолган Эрон аёллар терма жамоасининг беш нафар футболчиси Австралияда бошпана олади. Бу ҳақда 10 март, сешанба куни Австралия ички ишлар вазири Тони Берк маълум қилди. Унинг айтишича, у бир кун аввал кечқурун уларнинг ҳуманитар виза олиш учун берган аризаларини имзолаган. Шунингдек, у Австралия полицияси спортчи қизларни “хавфсиз жой”га жойлаштирганини айтди.

9 март, душанба куни АҚШ президенти Доналд Трамп омма олдида Австралияни эронлик футболчи қизларга бошпана беришга чақирди. Улар Исроил ва АҚШнинг Эрондаги уруши бошланишидан олдин Осиё кубогида иштирок этиш учун Австралияга келган эди. Трампнинг сўзларига кўра, уларни ватанга қайтармаслик керак, чунки у ерда уларни “жуда катта эҳтимол билан” ўлим кутаётган бўлиши мумкин. Америка президенти агар Австралия спортчи қизларга бошпана бермаса, буни АҚШ амалга оширишини ваъда қилди. Унинг айтишича, у бу мавзуни Австралия бош вазири Энтони Албанезе билан муҳокама қилган.

Кейинроқ Трамп ўзининг Truth Social ижтимоий тармоғида Австралия ҳукумат органлари беш нафар спортчига бошпана беришни маъқуллагани, бошқалар эса ўз навбатини кутаётганини ёзди.

“Беш нафари аллақачон жойлаштирилди, қолганлари эса йўлда. Бироқ айримлар қайтиши керак, деб ҳисобламоқда, чунки улар оилаларининг хавфсизлигидан хавотирда, жумладан, агар улар қайтмаса, оила аъзоларига таҳдидлар бўлиши мумкин”, — деди Оқ уй раҳбари. У яна Австралия бош вазири “бу жуда нозик вазиятни яхши бошқараётгани”ни қўшимча қилди.

Жанубий Кореяга қарши ўйин олдидан мадҳия ижро этилган вақтда футболчи қизлар жим турган эди. Эрон телевидениеси бу ҳолатни “ҳаёсизликнинг энг юқори чўққиси” деб атаган. Кейинги ўйинлар олдидан эса улар мамлакат мадҳиясини ижро этди.

CNN Sports телеканали маълумотига кўра, Эрон аёллар терма жамоасининг камида етти нафар спортчиси миллий жамоа жойлашган ҳудудни тарк этган. Кейинчалик маълум бўлишича, улардан беш нафари Австралия полицияси томонидан ҳимоя остига олинган. Қолган икки аёлнинг тақдири ҳақида ҳозирча ҳеч қандай маълумот йўқ.

Эрон аёллар футбол терма жамоаси 8 март, якшанба куни Осиё кубоги гуруҳ босқичидаги сўнгги учрашувида Филиппинга мағлуб бўлди. Одатда, гуруҳ босқичидан чиқиб кетган жамоалар чемпионат ўтказилаётган мамлакатни бир неча кун ичида тарк этади.