Днипрода Россия зарбаси оқибатида саккизта кўп қаватли уй зарар кўрди

Россиянинг Днипрога берган зарбалари оқибатида бир нечта кўп қаватли уйга шикаст етди. 10 киши жабрланган, улар орасида 12 ёшли бола ҳам бор. Кечқурун ва тун давомида Харкивга дронлар орқали бир нечта ҳужумлар қайд этилди.

Фото: Telegram / borys_filatovv

10 март, сешанбага ўтар кечаси Россиянинг Днипрога берган зарбаси натижасида камида саккизта кўп қаватли турар жой биносига шикаст етди. Бу ҳақда шаҳар ҳокими Борис Филатов маълум қилди. Унинг айтишича, уйларда бир неча юзта ойна синган.

Днипропетровск вилояти ҳарбий маъмурияти раҳбари Александр Ганжанинг сўзларига кўра, ўн киши жароҳат олган, улар орасида 12 ёшли бола ҳам бор. Икки нафар аёл шифохонага ётқизилган, яна бир нечта кишига эса жойнинг ўзида тиббий ёрдам кўрсатилган.

Ганжа аниқлик киритишича, уйлардан бирида ёнғин чиққан. Бошқа бинолар қаторида портлаш тўлқини таъсирида банк биноси ҳам шикастланган.

Шунингдек, 9 март кечқурун ва 10 мартга ўтар кечаси Россия дронлари Харкивга икки тўлқинда зарба берди. Шаҳарнинг Индустриал туманида, дастлабки маълумотларга кўра, “Герань-2” туридаги учувчисиз аппарат турар жой кўп қаватли уйлари яқинига зарба берган. Ҳокимият маълумотларига кўра, саккиз киши жабрланган.

Ҳужум оқибатида автомашиналар ва уйларнинг қуйи қаватларидаги хонадонлар ёнган, квартиралардаги ойналар синган.

Кейинроқ Харкивнинг Холодногорск тумани ҳам ҳужумга учради — шаҳар ҳокими Игор Тереховнинг сўзларига кўра, у ерда икки киши жабрланган, хусусий уйлар ва хўжалик иншоотларига шикаст етган.