Нидерландия: Россиялик ҳакерлар Signal ва WhatsApp’га бузиб киришга уринмоқда

Нидерландия ҳарбийлари, амалдорлари ва журналистлари россиялик ҳакерлар гумон қилинаётган мессенжерларни бузиш бўйича глобал кампаниядан жабрланган бўлиши мумкин. Бу ҳақда Нидерландиянинг икки разведка идораси маълум қилди.

Фото: picture-alliance/dpa/W. Kastl

Россиялик ҳакерлар Signal ва WhatsApp мессенжерларини бузиш бўйича глобал кампанияни бошлади. Нидерландияда амалдорлар, ҳарбий хизматчилар ва журналистлар мессенжерларининг бузилгани ҳақида ушбу мамлакатнинг икки разведка идораси — қиролликнинг Умумий разведка ва хавфсизлик хизмати (AIVD) ҳамда Ҳарбий разведка ва хавфсизлик хизмати (MIVD) 9 март, душанба куни қўшма баёнотда маълум қилди.

Разведка хизматлари шундай баёнот берди: “Россиялик ҳакерлар, эҳтимол, махфий маълумотлардан фойдаланиш имконига эга бўлган”.

Разведка маълумотларига кўра, ҳакерлар икки босқичли аутентификация учун мўлжалланган кодларни алдаб олишга ва шахсий аккаунт ёки гуруҳ чатларига киришга уринмоқда. Reuters агентлиги қайд этишича, Signal мессенжерида ҳакерлар ўзини Signal Support қўллаб-қувватлаш хизмати чат-боти сифатида кўрсатиб, эҳтимолий қурбонларни кодларни ошкор қилишга ундайди.

Бузишнинг яна бир усули — Signal’даги “боғланган қурилмалар” функциясидан фойдаланишдир. Нидерландия разведка идоралари таъкидлашича, контактлар рўйхатида икки хил бир хил фойдаланувчи пайдо бўлиши ёки телефон рақамлари “ўчирилган аккаунтлар” сифатида кўриниши аккаунт бузилганини англатиши мумкин.

AIVD ва MIVD таъкидлашича, бу ҳодисалар “кенг кўламли глобал киберкампания”нинг бир қисми ҳисобланади. Улар яна қайси давлатлар жабрланган бўлиши мумкинлигига аниқлик киритмади.

Бундан ташқари, Нидерландия идоралари киберхавфлар ҳақида огоҳлантириш эълон қилгани, ҳукуматдаги ҳамкасбларини мавжуд заифликлар ҳақида хабардор этгани ва таҳдидни бартараф этишда ёрдам кўрсатгани айтилди.

MIVD директори, вице-адмирал Питер Рейсинк шундай огоҳлантирди: “Ҳатто бошидан охиригача шифрлаш мавжуд бўлса ҳам, Signal ва WhatsApp каби мессенжерлардан махфий, конфиденциал ёки муҳим ахборотни узатиш канали сифатида фойдаланмаслик керак”.