Март ойидаги байрамлар: неча кунлик дам олиш кутиляпти?

2026 йил март ойида Рамазон ҳайити ва Наврўз байрамлари муносабати билан 5 кунлик иш ҳафтасида ишлайдиган ходимлар кетма-кет 4 кун, 6 кунлик иш ҳафтасида ишлайдиганлар эса 3 кун дам олади.

Фото: iStock

Ўзбекистонда Рамазон ойи 19 февралдан бошланган. Шу билан бирга, 2026 йил Рамазон ҳайити 20 март, жума кунига тўғри келиши кутиляпти.

Наврўз байрами эса ҳар йили 21 март куни нишонланади. 2026 йилда ушбу сана шанба кунига тўғри келади. Меҳнат кодексининг 208-моддасига мувофиқ, агар ишланмайдиган байрам куни дам олиш кунига тўғри келса, дам олиш куни кейинги иш кунига кўчирилади. Шу боис 21 мартдаги байрам муносабати билан дам олиш куни 23 март, душанбага ўтади.

Шундан келиб чиқиб, 5 кунлик иш ҳафтасида ишлайдиган ходимлар учун дам олиш кунлари қуйидагича бўлади:

20 март — Рамазон ҳайити;
21 март — Наврўз байрами;
22 март — якшанба;
23 март — кўчирилган дам олиш куни.

6 кунлик иш ҳафтасида ишлайдиган ходимлар эса 20, 21 ва 22 март кунлари дам олади. Улар учун 23 март, душанба иш куни бўлиб қолади.

Шу тариқа, март ойида байрамлар туфайли 5 кунлик иш тартибида ишловчилар учун 4 кунлик, 6 кунлик иш тартибидагилар учун эса 3 кунлик узлуксиз дам олиш имконияти юзага келади.

Айни пайтда, Рамазон ҳайитини нишонлаш бўйича алоҳида президент қарори эълон қилинса, тартиб расман янада аниқлаштирилиши мумкин.