Саида Мирзиёева Вашингтонда АҚШ Давлат котиби Марко Рубио билан учрашди

Бизнес-нонушта форматидаги учрашувда Америка–Ўзбекистон ишбилармонлик ва инвестиция кенгаши йиғилиши натижалари муҳокама қилинди, шунингдек, иқтисодий лойиҳалар портфели изчил кенгайиб бораётгани қайд этилди.

Фото: Telegram / Saida Mirziyoyeva

Президент Администрацияси раҳбари Саида Мирзиёева 7 апрель куни Вашингтон шаҳрида АҚШ Давлат котиби Марко Рубио билан бизнес-нонушта форматида учрашди.

«Суҳбат чоғида Америка–Ўзбекистон ишбилармонлик ва инвестиция кенгаши йиғилиши натижаларини муҳокама қилдик, шунингдек, иқтисодий лойиҳалар портфели изчил кенгайиб бораётганини қайд этдик. Стратегик шериклигимизни янада ривожлантиришга қўшаётган катта ҳиссаси учун жаноб Давлат котибига ўз миннатдорлигимни билдираман», деб ёзди Саида Мирзиёева бу ҳақда.

Аввалроқ, Саида Мирзиёева Вашингтонда Америка-Ўзбекистон ишбилармонлик ва инвестиция кенгаши расман ўз фаолиятини бошлагани ҳақида хабар берган эди.

Шунингдек, Америка–Ўзбекистон ишбилармонлик ва инвестиция кенгаши ҳамраиси, элчи Сержио Гор билан ҳам учрашди. Икки давлат ўртасидаги ишбилармонлик ҳамкорлигининг асосий йўналишлари муҳокама қилинди.