АҚШ Сенати Эрон билан урушни тўхтатиш ҳақидаги резолюцияни рад этди

АҚШ Конгресси Сенати президент Дональд Трамп маъмуриятини Эронга қарши ҳарбий ҳаракатларни тўхтатишга ва Конгресс куч ишлатишни расман маъқулламагунига қадар америкалик ҳарбийларни можаро ҳудудидан олиб чиқишга мажбурлашни назарда тутган резолюцияни қўллаб-қувватламади.

Фото: picture alliance

Демократик партия вакиллари ташаббуси билан илгари сурилган ушбу ҳужжат учун 47 нафар сенатор овоз берган бўлса, 52 нафар сенатор қарши чиққан. Associated Press хабар қилишича, Конгресс юқори палатасида ҳозирда Республикачилар партияси назоратни сақлаб турибди ва бу овоз бериш натижасига катта таъсир кўрсатган.

Резолюция муаллифлари бўлган демократ сенаторлар Эронга қарши ҳарбий кампания ноқонуний экани ва у етарли ҳуқуқий асосга эга эмаслигини таъкидламоқда. Улар можаро тугамагунича бу каби ташаббусларни Сенат муҳокамасига қайта-қайта олиб чиқиш ниятида эканини билдирган.

AP қайд этишича, бу 2026 йил бошидан буён Сенат президентнинг ҳарбий қарорларини чеклашга қаратилган ташаббусни тўртинчи бор рад этиши бўлди. Бу орқали Сенат амалда уруш ва ҳарбий ваколатлар масаласидаги конституциявий таъсирини президент фойдасига чеклаб келаётгани айтилмоқда.

1973 йилда қабул қилинган Ҳарбий ваколатлар тўғрисидаги қонунга кўра, Конгресс ҳарбий ҳаракатлар бошланганидан кейин 60 кун ичида уруш эълон қилиши ёки куч ишлатишга расмий рухсат бериши керак. Хабарларга кўра, бу муддат апрель ойи охирига бориб тугайди, аммо қонун уни яна 30 кунгача узайтириш имконини ҳам беради.

Қонунчилик органида айрим сенаторлар Трамп маъмурияти яқин кунларда можарони тартибга солиш ва кескинликни пасайтириш бўйича батафсилроқ режа тақдим этишини кутаётганини билдирган. Шу билан бирга, АҚШ ОАВ таъкидлашича, қуролли кучлардан фойдаланиш бўйича қарорлар қабул қилишда Конгресснинг ўрни ички сиёсий кун тартибидаги энг баҳсли масалалардан бири бўлиб қолмоқда.