IPO якунлари: Миллий инвестиция жамғармасининг 31 фоизи 603,6 млн долларга сотилди

Ўзбекистон Миллий инвестиция жамғармаси ўз акцияларининг бирламчи оммавий таклифи (IPO) натижаларини эълон қилди.

Маҳаллий ва халқаро фонд бозорларида бир вақтда кечган оммавий таклиф натижасида компаниянинг 31 фоиз акциялари 603,6 млн долларга сотилди.

Хусусан:

• Тошкент фонд биржасида қарийб 47,9 миллион дона акция (сотувга чиқарилган жами акцияларнинг қарийб 3 фоизи) 4,65 сўмдан, 12 млрд сўмгача қийматда буюртма берган жисмоний шахсларга эса 5 фоизлик чегирма билан 4,41 сўмдан сотилди;
• Лондон фонд биржасида эса қарийб 1,5 триллион дона акция жами 23,4 миллионта глобал депозитар тилхат (GDR) шаклида 25 доллардан реализация қилинди.

Бундан ташқари, келгуси 30 кун ичида Лондон фонд биржасида яна қарийб 3,5 миллион донагача GDR қўшимча жойлаштириш опциони (over-allotment option) доирасида сотилиши мумкин.

Қўшимча опцион тўлиқ реализация қилинган тақдирда, бирламчи оммавий таклиф жамғарманинг 35 фоиз улуши 692 млн долларга сотилиши билан якунланиши мумкин. Аввалроқ акциялар сотувидан тушган барча маблағлар давлат бюджетига тушиши маълум қилинганди.

Бирламчи жойлаштириш нархи асосида, Миллий инвестиция жамғармасининг бозор капитализацияси 1,95 млрд долларни ташкил этди.

“Мазкур IPO Ўзбекистон компаниясининг халқаро бозордаги биринчи оммавий таклифи бўлиб, мамлакатда ҳам хорижий, ҳам маҳаллий инвесторлар учун қўшимча имкониятларни очади, Миллий инвестиция жамғармаси портфелидаги компаниялари билан бирга Ўзбекистоннинг бошқа компанияларида ҳам оммавий капитал бозорларига чиқишга рағбат уйғотади”, – деди Templeton Global Investments'нинг Марказий Осиё бўйича бош директори Мариус Дан.

Лондон фонд биржасида бугун, 13 майдан эътиборан шартли савдолар бошланиши кутилмоқда. 18 майдан эътиборан GDR'ларнинг шартсиз савдоси, Тошкент фонд биржасида эса акцияларнинг иккиламчи савдоси бошланади.