МРБ раҳбари Кубага Трампнинг таклифини етказди

АҚШ Марказий разведка бошқармаси (МРБ) директори Жон Рэтклифф Ҳаванада Куба Ички ишлар вазирлигининг юқори лавозимли амалдорлари билан учрашди. У Куба ҳукуматига Дональд Трампнинг музокаралар бўйича таклифини етказган.

Фото: AP

Reuters агентлигининг хабар беришича, учрашув 14 май куни бўлиб ўтган. Куба ҳукумати баёнотида айтилишича, музокаралар икки давлат ўртасидаги сиёсий мулоқотни ривожлантириш мақсадида ташкил этилган.

Куба томони АҚШга орол мамлакати Америка миллий хавфсизлиги учун таҳдид эмаслигини исботловчи далиллар тақдим этганини маълум қилди. Шунингдек, Ҳавана Вашингтондан Кубани терроризмни қўллаб-қувватловчи давлатлар рўйхатидан чиқаришни талаб қилган.

Reuters суҳбатлашган МРБ вакилига кўра, Жон Рэтклифф Куба расмийларига АҚШ президенти Дональд Трампнинг мурожаатини етказган. Унда Вашингтон иқтисодий ва хавфсизлик масалалари бўйича музокараларга тайёр экани, аммо бу фақат Кубада “туб ўзгаришлар” амалга оширилган тақдирдагина мумкинлиги айтилган.

Шу билан бирга, Кубада ёнилғи инқирози кучайиб бормоқда. Мамлакат энергетика ва тоғ-кон саноати вазири Висенте де ла О Леви 13 май куни мамлакатда ёнилғи захиралари деярли тугаганини маълум қилди.

Унинг айтишича, бу ҳолат электр энергияси узилишларини кескин кучайтирган. Ҳавана ва атроф ҳудудларда электр таъминоти кунига 20–22 соатгача ўчириб қўйилмоқда. Оролда озиқ-овқат ва дори-дармон танқислиги ҳам кучайган.

13 май оқшомида Ҳаванада норозилик намойишлари бўлиб ўтди. Намойишчилар “Чироқларни ёқинг!” ва “Бирлашган халқни енгиб бўлмайди!” деган шиорларни кўтариб чиққан.

Яқин вақтгача Кубага нефть етказиб берувчи асосий давлатлардан бири Венесуэла эди. Аммо Венесуэла раҳбари Николас Мадуро АҚШ ҳарбийлари томонидан қўлга олинганидан кейин Каракас Кубага нефть экспортини тўхтатган.

Трамп Кубани “АҚШ миллий хавфсизлиги учун жиддий таҳдид” деб атаб, Ҳаванага ёнилғи етказиб берувчи давлатларга бож жорий этиш билан таҳдид қилган.

Шунга қарамай, 30 март куни Россия танкери Кубага 100 минг тонна хом нефть олиб келган. Аммо бу захира апрель охиригача етарли бўлган холос.

Куба ҳукумати янги ёнилғи етказиб берувчиларни қидирмоқда, бироқ АҚШ ва Исроилнинг Эрон билан уруши туфайли нефть нархининг ошиши бу жараённи қийинлаштирмоқда.

БМТ эса АҚШнинг Кубага қарши блокадаси “Куба халқининг ривожланиш ҳуқуқини бузмоқда” деб баҳолади. Ташкилот фикрича, санкциялар аҳолининг озиқ-овқат, таълим, тиббиёт, сув таъминоти ва муносиб санитария шароитларига бўлган ҳуқуқига салбий таъсир кўрсатмоқда.