Конгресс Трампнинг Эрон бўйича ваколатларини чеклаши мумкин

АҚШ Сенати президент Дональд Трампни Конгресс рухсатисиз Эронга қарши ҳарбий ҳаракатларни тўхтатишга мажбур этиши мумкин бўлган резолюцияни кўриб чиқишни қўллаб-қувватлади. Ушбу ҳужжат қабул қилинса, Трамп келгусида Эронга қарши ҳар қандай ҳарбий операцияни Конгресс билан келишишига тўғри келади.

Фото: REUTERS

19 май куни бўлиб ўтган овоз бериш жараёнида резолюцияни Сенатда муҳокама қилишни 50 нафар сенатор қўллаб-қувватлади, 47 нафари қарши овоз берди. CNN маълумотига кўра, сайлов кампаниялари сабабли уч нафар республикачи сенатор овоз беришда қатнашмаган. Шу боис резолюциянинг Сенат тўлиқ таркиби томонидан қабул қилиниши эҳтимоли паст баҳоланмоқда.

Маълум қилинишича, жорий йилда республикачилар мазкур резолюцияни Сенатда илгари суриш бўйича аввалги етти уринишни блоклаган. Ҳужжат дастлаб март ойида, АҚШ ва Исроилнинг Эронга қарши ҳарбий операцияси бошланганидан кейин овозга қўйилган эди. Шунингдек, республикачилар АҚШ Вакиллар палатасида ҳам уни уч марта рад этган.

Резолюция ташаббускори бўлган демократ сенатор Тим Кейннинг айтишича, апрель ойи бошидан буён амал қилаётган АҚШ ва Эрон ўртасидаги сулҳ даврида Трамп ўз позициясини Конгрессга тушунтириши учун имконият пайдо бўлган.

“Бу — яна уруш бошланишидан олдин муҳокама қилиш учун энг тўғри вақт. Президент тинчлик ва дипломатик таклифларни қабул қилмоқда, аммо уларни биз билан муҳокама қилмасдан рад этмоқда”, — деди Тим Кейн Reuters агентлигига.

1973 йилда қабул қилинган “Ҳарбий ваколатлар тўғрисида”ги қонунга кўра, АҚШ президенти Конгресс розилигисиз фақат 60 кун давомида ҳарбий ҳаракатлар олиб бориши мумкин. Бу муддат тугагач, президент ё урушни тўхтатиши, ёки ҳарбий куч ишлатиш учун Конгрессдан расмий рухсат олиши шарт.

2026 йил 1 май куни 60 кунлик муддат якунланганидан сўнг Дональд Трамп Конгрессга “Эрон билан уруш якунлангани” ҳақида хабар берган. Бироқ Reuters маълумотига кўра, АҚШ амалда Эрон портларини блокада қилиш ва Эрон кемаларига зарбалар беришни давом эттирмоқда.