Логистикада стратегик битим: Asyad Group, Orient Group ва Uzbek-Oman Investment Company Ўзбекистон инфратузилмасини ривожлантирмоқда

Тошкент, 2026 йил 22 май — Asyad Group, Orient Group ва Uzbek-Oman Investment Company Ўзбекистоннинг минтақавий транспорт ва савдо йўналишларидаги ортиб бораётган аҳамиятини таъкидлаган ҳолда, мамлакат логистика инфратузилмасини ривожлантириш бўйича стратегик битим якунланганини эълон қилди.

Ҳамкорлик доирасида Asyad Group Universal Logistics Services ва Highway Logistics Center фаолияти билан боғлиқ логистика активларидаги стратегик улушни қўлга киритади. Томонлар терминал, омборхона ва мултимодал инфратузилмани биргаликда ривожлантириш, халқаро операцион стандартларни жорий этиш ҳамда Ўзбекистоннинг халқаро транспорт йўлакларидаги иштирокини кенгайтириш ниятида. Тошкентнинг асосий юк ташиш марказларидан бири бўлган Чуқурсой бекатидаги инфратузилмани ривожлантиришга алоҳида эътибор қаратилмоқда.

Даврон Oзгурер, Orient Group Management бош директори:

“Orient Group учун ушбу ҳамкорлик логистика йўналишимизни ривожлантириш ва Ўзбекистон инфратузилма секторига халқаро тажрибани жалб қилишда муҳим босқичдир. Asyad Group ва Uzbek-Oman Investment Company билан биргаликда биз замонавий логистика ечимларини ривожлантиришга ва Ўзбекистоннинг халқаро транспорт йўлакларига интеграциясини кучайтиришга йўналтирилган узоқ муддатли ҳамкорлик моделини яратдик”.

Абдулраҳмон Салим Ал-Хатмий, Asyad Group бош директори:

“Ўзбекистон — Марказий Осиёдаги энг истиқболли логистика бозорларидан бири. Orient Group ва Uzbek-Oman Investment Company билан ҳамкорлик Asyad Group’нинг халқаро тажрибасини шерикларнинг маҳаллий бозорга оид чуқур билими ва тажрибаси билан бирлаштиришга имкон беради ҳамда янги савдо йўналишларини янада ўстириш ва ривожлантириш учун замин яратади”.

Баҳром Умар Маҳмуд Муҳаммад, UzOman бош директори:

“Asyad Group’нинг Ўзбекистон логистика бозорига кириб келиши Уммон Султонлигининг Ўзбекистон Республикаси билан стратегик шерикликка содиқлигини тасдиқлайди. Orient Group билан ҳамкорлигимизни ривожлантирган ҳолда, ушбу битим Ўзбекистонга жаҳон даражасидаги логистика тажрибасини олиб киради ҳамда Марказий Осиё ва Яқин Шарқ ўртасидаги тижорат йўлагини мустаҳкамлайди”.

Ушбу битим минтақавий савдонинг ўсиши ва минтақанинг глобал таъминот занжирларига интеграциялашуви туфайли халқаро инвесторларнинг Ўзбекистон транспорт-логистика секторига қизиқиши ортиб бораётганини акс эттиради.

Asyad Group — Уммон Султонлигининг глобал интеграциялашган логистика гуруҳи бўлиб, унинг умумий активлари қарийб 5 миллиард АҚШ долларини, йиллик даромади эса 1 миллиард АҚШ долларидан ортиғини ташкил этади. 2026 йилда гуруҳ Британиянинг Ligentia Group компаниясини сотиб олиб, ўзининг халқаро тармоғини 24 мамлакат ва 76 шаҳаргача кенгайтирди.

Orient Group — логистика, турар жой ва тижорат кўчмас мулкини ривожлантириш, саноат ишлаб чиқариши ва чакана савдо соҳаларидаги лойиҳаларга эга бўлган Ўзбекистоннинг кўп тармоқли ҳолдинг компанияси.

Uzbek-Oman Investment Company — Ўзбекистон Республикаси ва Уммон Султонлиги ўртасида иқтисодий ҳамкорликни ривожлантириш мақсадида ташкил этилган инвестиция компанияси.

Реклама ҳуқуқи асосида