DW хабарига кўра, ўнг қанот Либерал партиясидан президентликка собиқ номзод 29 октябрга ўтар кечаси X ижтимоий тармоғида «Бразилия халқига мактуби»ни эълон қилган.
ОАВ маълумотларига кўра, Болсонару дастлаб ўзини мамлакатнинг «ҳақиқий президенти» ва «сайланган президенти» деб атаган, кейинроқ эса бу ибораларни ўчирган.
Натижаларни партияси тан олган
25 октябр куни ўтказилган президентлик сайловининг иккинчи турида амалдаги давлат раҳбари Луис Инасиу Лула да Силва 51,79 фоиз, Флавиу Болсонару эса 48,21 фоиз овоз олган.
Болсонару натижаларни тан олмаслигини билдирган бўлса-да, 26 октябр куни унинг Либерал партияси мағлубиятни тан олган.
Мактубда сиёсатчи Луланинг ғалабаси қонунбузилиши ва коррупциялашган суд тизими туфайли қўлга киритилганини даъво қилган. У хориждан туриб Бразилияда демократия учун курашга бошчилик қилишини, Лула да Силванинг «диктаторлик режими» ўрнатишига йўл қўймасликни исташини ёзган.
Бироқ мурожаатда сайлов сохталаштирилганига доир аниқ далиллар келтирилмаган.
Чиқиш тақиқидан кейин Майамига борган
Хабарга кўра, 26 октябр куни Болсонаруга мамлакатдан чиқиш тақиқланган ва оддий ҳамда дипломатик паспортларини топшириш ҳақида Олий суд қарори берилган. Бу коррупция, пул ювиш ва солиқ тўлашдан бўйин товлашга оид терговлар билан боғлиқ.
Аргентина миграция идораси маълумотига кўра, Болсонару рафиқаси Фернанда ва икки қизи билан Бразилия чегарасидаги Танкреду Невис пункти орқали Аргентинага кирган. Идора улар амалдаги сафар ҳужжатларини тақдим этгани ва кириш учун ҳуқуқий тўсиқлар бўлмаганини билдирган.
DW ёзишича, сиёсатчи Аргентинадан Эквадорга, у ердан эса Майамига йўл олган бўлиши мумкин. У паспортларини топшириш ҳақидаги суд талабини бажарган-бажармагани номаълум. ОАВ унинг Италия фуқаролиги ҳам борлигини хабар қилган.
Болсонару мактубида АҚШ президенти Доналд Трамп ва Аргентина президенти Хавьер Милейга қўллаб-қувватлов учун миннатдорлик билдирган.
Бразилияда мурожаат танқид қилинди
