Арманистон бош вазири Никол Пашиняннинг «Фуқаролик шартномаси» номли партияси 7 июн куни бўлиб ўтган парламент сайловларида 48,8 фоиз овоз олиб, ғалабага эришди. Мухолифатчиларнинг келиб чиқишига кўра арман бўлган россиялик йирик тадбиркор Самвел Карапетян бошчилигидаги «Кучли Арманистон» алянси эса 23,2 фоиз овоз билан иккинчи бўлди.
Сайловлар Москва ва Ереван ўртасидаги жиддий келишмовчилик фонида бўлиб ўтди: Кремлдагилар бир неча бор Арманистоннинг Европа Иттифоқи билан яқинлашувидан норозилик билдирди. Россия сўнгги ҳафталарда Ереванга босим ўтказишга уринди, жумладан, Арманистондан кўплаб маҳсулотларни олиб киришни тақиқлаш орқали. Масалан, кўплаб сабзавот ва мевалар, балиқ, минерал сув, гуллар тақиққа тушди. Назарий жиҳатдан, Арманистондан товарлар етказиб беришни тўхтатиш мамлакат ташқи сиёсатида «европача» йўналиш ташаббускори бўлган Никол Пашиняннинг халқ орасидаги обрўсига, шунингдек, унинг партиясининг парламент сайловларидаги натижаларига салбий таъсир кўрсатиши мумкин эди.
Россиянинг Арманистондаги сайловларни ёритган давлат телеканаллари Пашинян партияси ғалабасининг аҳамиятини йўққа чиқаришга ҳаракат қилди.
Anthony Pizzoferrato / AP / Scanpix / LETA
«Кўп сонли қоидабузарликлар»
«Россия 1» телеканалининг «Вести» дастури мухбири «ҳукмрон партия ғолиб чиққан бўлса-да, парламентни якка тартибда шакллантириш ҳуқуқини берувчи 50 фоизлик чегарадан ўтиш партиянинг қўлидан келмагани»ни таъкидлади.
Аслида эса, Никол Пашинян партияси сайловда қўлга киритган натижа «Фуқаролик шартномаси» парламентда кўпчиликни ташкил этишини англатади. Дастлабки маълумотларга кўра, партия Арманистон парламентидаги 101 ўриндан 58 тасини қўлга киритади.
«Биринчи канал» мухбири сайловдаги фаоллик одатий ҳолат эканини қайд этди. Аслида, сайлов ҳуқуқига эга фуқароларнинг 58,97 фоизи иштирок этиши – сўнгги тўққиз йилдаги парламент сайловларидаги энг юқори кўрсаткичдир: 2021 ва 2018 йилларда давомат 50 фоиздан паст бўлган.
«Энг можароли сайлов»
«Давомат қарийб 60 фоизга етди. Бироқ, бу сайлов фақат шу билангина ёдда қолмайди», – деди «Биринчи канал» мухбири Михаил Ракитский жонли эфирда «мисли кўрилмаган миқдордаги» қоидабузарликлар ҳақидаги ҳикоя қилиб беришдан олдин.
