Мундиалда 5-кун. Испанияни тўхтатган «бувижон» ва мағлубиятсиз бораётган Осиё жамоалари
|16:59 / 16.06.202613 08311 мин
Куннинг тўрт ўйинида ҳам дуранг қайд этилди.
Жаҳон чемпионатининг навбатдаги кунида тўртта учрашув ўтказилди ва бу ўйинларнинг бирортасида ғолиб жамоа топилмади. Испания Кабо-Верде билан ўйинда сенсацион равишда очко йўқотди (0:0), Белгия Мисрни (1:1), Уругвай Саудия Арабистонини енга олмади (1:1), Эрон эса турнирни Янги Зеландия билан дуранг ўйнаш билан бошлади (2:2). Майдондан ташқарида ҳам эътиборли воқеалар бўлмоқда: Тунис биринчи ўйиндан кейиноқ бош мураббийини истеъфога чиқарди, португаллар эса машғулот ўтказа олмади.
Кабо-Верде – ЖЧ дебютанти, испанлар эса Европа чемпионатининг амалдаги ғолиби ва ҳозирги турнирнинг асосий фаворитларидан бири. Аммо ушбу жуфтликда ҳам сенсация рўй берди: африкаликлар «Қизил фурия» ҳужумларига дош берди ва дарвозаси дахлсизлигини сақлаб қолиб, илк очкосини қўлга киритди.
Кабовердиликлар сафидаги асосий қаҳрамон 40 ёшли дарвозабон Возиня бўлди – у ишончли ҳаракат қилиб, рақибларнинг умидларини чиппакка чиқарди ва ўйин давомида етти бор сейв амалга оширди. Жозимар Диашнинг (дарвозабоннинг ҳақиқий исми) перфоманси томошабинларда шу қадар катта таассурот қолдирдики, у ўйиндан кейин жаҳон миқёсидаги юлдузга айланди: унинг инстаграмдаги саҳифасига бир неча соат ичида беш миллиондан ортиқ ўқувчи обуна бўлди (ўйиндан олдин унинг кузатувчилари сони атиги бир неча ўн минг киши эди).
Возинянинг ўзи (унинг лақаби португалчадан таржимада «бувижон» маъносини беради – у болалигида ўйинларда ўзига қилинган ноҳақликдан кейин бувисининг олдига шикоят қилиб боравергани учун бошқа болалар томонидан шундай лақаб олган) ўйиндан кейин йиғлади.
«Шунинг учун йиғлаяпманки, мен бувим ва бобом билан ўсганман, улар эса, афсуски, бу ерда эмас... Улар бир неча йил олдин вафот этиб кетишган. Улар мен учун барча нарса эди, мен учун барча ишни қилишганди. Ва яна онам учун...у бу ерга қила олмади – виза жуда қимматлик қилди. Биз вақтида тўлов қила олмадик. Мен у бу ерда бўлишини жуда хоҳлагандим, аммо барибир жуда хурсандман. Жуда бахтиёрман», – деди футболчи.
Мавзуга оид
Жамоанинг бошқа футболчилари ҳам бу натижада ўз ҳиссасини қўшишди. Кабо-Верде ҳозирча турнирнинг энг тартибли жамоаси бўлиб турибди. Бутун ўйин давомида ҳакам улар томонидан атиги битта фол қайд этди.
Жаҳон чемпионати – доим ҳам қувноқ ўйинлар дегани эмас. Белгия ва Миср ўртасидаги учрашув бунга яққол мисол. Яқин вақтларгача Европанинг энг ёрқин жамоаси ҳисобланган белгияликлар ва Африканинг гегемон жамоаларидан бири бўлган мисрликлар ўртасидаги учрашувда ғолиб жамоа аниқланмади.
Лекин улар испанлардан фарқли равишда гол ура олишди. 19-дақиқада Муҳаммад Салоҳнинг узатмасидан кейин Имом Ашур ҳисобни очди. Белгияликлар фақат иккинчи бўлимда мувозанатни тиклашга эришишди. Ромелу Лукаку майдонга тушганига 22 сония бўлганида Муҳаммад Ханини автогол уришга мажбур қилди.
Умуман олганда, бу натижа ҳеч кимни қониқтирмади: икки жамоа футболчиларини ҳам, уларнинг мухлисларини ҳам ва бетараф томошабинларни ҳам.
Испания ва Белгия ортидан яна бир гранд жамоа очко йўқотди. Уругвай бу турнирга Луис Суарес ва Эдинсон Кавани каби етакчиларисиз келган (иккиси ҳам терма жамоадаги фаолиятини якунлашган), аммо жанубий америкаликлар ҳар қандай ҳолатда ҳам гуруҳ фаворитлари қаторида бўлишади.
Саудияликлар ўйиннинг биринчи бўлимида номдор рақиб қаршисида шошиб қолишмади. Уругвайликлар эса жисмоний жиҳатдан ҳорғин кўринишди. Осиё вакиллари стандарт вазиятларга урғу қаратишди ва бўлим якунида айнан шундай вазиятлардан бири голга олиб келди: Фернандо Муслер биринчи зарбани қайтарди, аммо тўпга биринчи бўлиб етиб келган Ал-Амри дарвозани ишғол этди.
Биелса танаффусда икки футболчини алмаштирди, жумладан, Дарвин Нунесни майдондан олиб ташлади. Унинг шогирдлари иккинчи бўлимда тетикроқ ҳаракат қилишди, йигирмадан ортиқ зарба беришди, аммо Саудиянинг қуйи лигасида ўйновчи Ал-Увайс дарвозасига анча вақтгача йўл топилмади. Фақат ўйин охирларига борганда Максимилиано Араухо дарвозабондан қайтган тўпни дарвоза тўрига жойлаб қўйди ва жамоасини шармандали мағлубиятдан қутқариб қолди – 1:1.
Бу дурангдан кейин H гуруҳида яққол етакчи йўқ. Кейинги турда куни Уругвай Кабо-Верде билан, Испания Саудия Арабистонига қарши майдонга тушади.
Бу ҳозирча жаҳон чемпионатининг энг сиёсийлашган ўйини бўлди. Эрон ҳамон АҚШ билан уруш ҳолатида: ислом республикаси жамоаси турниргача йўлда катта қийинчиликлар ва можароларни бошдан кечирди: Америка расмийлари жамоани ўз ҳудудига фақат ўйин куни киргизди (унгача жамоа базаси Мексика ҳудудига кўчирилганди), шунингдек, делегациянинг 14 нафар аъзосига виза берилмади. Эронликлар жамоасида ички муаммолар ҳам етарли эди. Масалан, мамлакат футболи тарихидаги энг машҳур футболчилардан бири Сардор Ўзмун мухолифча қарашлари туфайли таркибга киритилмади. Ўйин бошланиши арафасида ҳам кескин муҳит ҳукм сураётганди. Америкада истиқомат қилувчи юзлаб эронликлар стадионг атрофида ҳозирги режимга қарши намойиш ўтказишди. Улар мамлакатнинг шоҳ бошқаруви давридаги байроқларини ҳилпиратишди ва Доналд Трампнинг портретларини кўтаришди.
Ўйиннинг ўзи эса тинч кечди. Шу куни Лос-Анжелесдаги 70 минг кишилик стадион лиқ тўлди. Эронликлар ўйинни фаоллик билан бошлаганди, аммо 7-дақиқадаёқ гол ўтказиб юборишди: Элайжа Жаст ҳисобни очишди. Аммо Океания вакиллари ҳисобдаги устунликни танаффусгача сақлаб қола олишмади – Рамин Ризоян мувозанатни тиклади.
Иккинчи бўлимда сценарий такрорланди. Янги зеландияликлар яна Жастнинг саъй-ҳаракатлари эвазига ҳисобда олдинга чиқиб олишди, аммо бу сафар ҳам жавоб голини ўтказиб юборишди. «Ростов» яримҳимоячиси Муҳаммад Муҳибий жарима майдонига оширилган тўпга барчадан илдамроқ ҳаракат қилиб, бош билан дарвозани ишғол этди.
Энди G гуруҳида ҳам барча жамоаларда биттадан очко бор ва иккинчи тур олдидан вазият чигаллашди. Кейинги турда Белгия Эрон билан, Миср Янги Зеландия билан ўйинда майдонга тушади.
Дастлабки истеъфо
Жаҳон чемпионати давомидаги истеъфолар – камдан кам кузатиладиган ҳолат, аммо бу сафарги турнир ўзгача бўлмоқда. Жаҳон тарихида илк бор турнир стартидаёқ бош мураббий истеъфога чиқарилди — тунисликлар устози Сабри Лямуши жабрланувчи ролида.
Инсайдларга кўра, 54 ёшли французни икки нарса учун кечиришмаган. Биринчиси – Швециядан учралган 1:5 ҳисобидаги мағлубият. Иккинчиси – унинг ўғлининг (мураббийлар штаби аъзоси) ўйиндан кейин фанатлар билан муштлашгани.
Лямуши Тунис миллий жамоаси бошқарувига кўп вақт бўлмаганди ва натижалар ҳам яхши эмасди: у жамоа билан беш ўйин ўтказиб, учтасида ютқазди (жумладан, Белгияга қарши ўртоқлик ўйини 0:5 ҳисобида якунланган) ва фақат биттасида ғалаба қозонди. Миш-мишларга кўра, уни жамоа футболчилари ҳам, мухлислар ҳам ёқтиришмаган. Энди тунисликларни турнирнинг қолган ўйинларида Мухтор Кебайер бошқариб туриши айтилмоқда, у миллий жамоада 2019 йилдан 2022 йилгача ҳам ишлаганди. Бошқа вариант ҳам бор: журналист Ромен Молинага кўра, «Карфаген бургутлари»ни қутқариш миссияси муқаддам Саудия Арабистони, Марокаш ва Кот-д'Ивуар каби жамоаларда ишлаган Эрве Ренарга топширилади.
Тунисни олдинда Нидерландия ва Японияга қарши ўйинлар кутмоқда.
Португаллар бўрондан азият чекди
Клублар ўртасидаги жаҳон чемпионати вақтидаёқ маълум эди: АҚШдаги об-ҳаво шароити ўйинларга катта таъсир кўрсатади. Ушбу мамлакатда тез-тез торнадо ва бўронлар бўлиб туради, шу туфайли хавф туғилган тақдирда ҳар қандай тадбирни зудлик билан тўхтатишни талаб қилувчи қатъий регламент мавжуд.
Ҳозирча бундай сабаб билан ўйинларни тўхтатишга тўғри келмади. Аммо табиий офат билан боғлиқ ҳодисалар кўпайиб бормоқда – 15 июн куни Португалия миллий жамоаси бўрон ҳақидаги огоҳлантириш туфайли аввалига матбуот анжуманини, кейин эса кечки машғулотларни бекор қилишга мажбур бўлди. Конго Демократик республикасига қарши ўйин учун Криштиану Роналду ва жамоадошлари ёпиқ павилионда тайёргарлик кўришига тўғри келди.
Португаллар учун бу турнирдаги илк муаммо эмас. Бир кун олдин Роберт Мартинес шогирдларига пляжда дам олишга рухсат берилмаганди. A Bola нашри ёзишича, хавфсизлик хизмати ходимлари мухлислар кўпайиб кетгани учун футболчиларни меҳмонхонадан чиқармаган. Фақат Рубен Диаш, Бернарду Силва ва Жоау Конселу каби футболчилар уларнинг тўсиғидан ўтиб, сувга тушишга муваффақ бўлган.
16-17 июн кунлари учун тақвим
Жаҳон чемпионатида қизиқ ўйинлар ҳали олдинда. 16 июн куни кечқурун ва 17-июнга ўтар кечаси қуйидаги ўйинлар бўлиб ўтади:
