Мунчоқ ортидаги хавф: Ўзбекистон халқаро фирибгарлар учун “ов майдони”га айланиб қолмоқда

“Бош қароргоҳимиз Гонконгда”

2026 йил 20 январ куни “Seven jade manufacturing” МЧЖ давлат рўйхатидан ўтказилган. Фаолият тури ихтисослашган улгуржи савдо бўлган МЧЖнинг ягона таъсисчиси Lin Nanzhou ҳисобланади.

МЧЖга солиқ қўмитаси томонидан ҚҚС тўловчиси сифатида рўйхатдан ўтганлиги тўғрисида гувоҳнома ҳам берилган.

Айни мана шу икки ҳужжат Seven jade номи остидаги молиявий пирамида ташкилотчиларига одамларни гўёки фаолиятлари қонуний эканига ишонтиришда етарли бўлмоқда.

Ўзбекистон учун ишлаб чиқилган “бизнес режа”да “Seven jade manufacturing” бош қароргоҳи Гонконгда жойлашган қайта ишлаш корхонаси экани айтилади. Бу “бизнес режа”ни сунъий интеллект тайёрлаганини англаш қийин эмас.

Қолаверса, интернетда Гонконгдаги ушбу компания ва Lin Nanzhou шахсига ҳеч қандай маълумот йўқ.

“Бой келажакни бирга қурамиз”

Кўплаб молиявий пирамидалар каби Seven jade ҳам одамлар қулоғига ёқадиган баландпарвоз гаплар орқали мақсадни улкан олмоқда.

Telegram’даги расмий каналида Seven jade халқаро даражада заргарлик буюмларини ишлаб чиқариш ва қайта ишлаш билан шуғулланувчи компания сифатида таништирилган. Компаниянинг савдо тармоғи бутун дунёга ёйилгани, Ўзбекистонда ҳам янги заводлар қуриб, буюртмаларни тез ва сифатли етказиб беришни таъминлаётгани айтилади.

Қайд этилишича, компания “уч томон учун фойда” модели асосида ишлайди: компания ишлаб чиқаришни кенгайтиради, чет эл буюртмаларини бажаради ва фойдани оширади, ходимлар барқарор иш ўрни ҳамда яхши даромадга эга бўлиб, ҳаёт сифатини яхшилайди, ҳамкорлар инвестиция ва ёрдам орқали компания ўсишидан улуш олади.

Ҳамкор бўлиш учун инвестиция киритиш зарурлиги Seven jade аслида молиявий пирамида эканини англатади. Қолаверса, Seven jade’да бошқаларни таклиф қилиш орқали даромад олиш ваъдаси ҳам бор. Бу молиявий пирамидаларнинг асосий тўрт устунидан бири ҳисобланади.

Бундан ташқари, таклиф қилинган одам сотиб оладиган пакетдан ҳам бонус ваъда қилинган. Бу молиявий пирамиданинг навбатдаги устуни.

Кунлик даромад ваъдаси

Seven jade номи билан махсус платформа ташкил қилинган. Унда ушбу молиявий пирамиданинг пул тикиш пакетлари, ҳисобни тўлдириш ва кунлик даромадни ечиб олиш усуллари ҳақида маълумотлар бор. Пакетлар мунчоқдан ясалган тақинчоқ маҳсулотлари билан ниқобланган.

Масалан, Azure glow bracelet маҳсулоти нархи 200 минг сўм қилиб белгиланган. Ушбу пакет 30 кун давомида фаол бўлади. Уни сотиб олиш орқали кунига 10 минг сўмдан бир ойда 300 минг сўм даромад олиш ваъда қилинган.

Ёки 600 минг сўмга Vintage amethyst bracelet маҳсулотини сотиб олиб, 30 кунда 900 минг сўм даромад олиш мумкинлиги келтирилган.

Шу тариқа нархлар ва ундан келадиган даромад миқдори ошириб борилган.

Пул кимга кетмоқда?    

Пакет сотиб олиш учун платформада рўйхатдан ўтиб, шахсий кабинет очиш керак бўлади. Сўнгра баланс тўлдирилади. Бу жараёнда пул ўтказиш P2P шаклида амалга оширилади. Платформада бунинг учун Лазокат Насриддинова номига очилган банк картаси рақами киритиб қўйилган.

Савдо тармоғи бутун дунёга ёйилгани, Ўзбекистонда ҳам янги заводлар қургани айтилаётган компания одамлардан P2P орқали пул йиғишига қандай қараш мумкин?

Бир манзил, бир ном

Seven jade молиявий пирамидаси “Seven jade manufacturing” МЧЖга тегишлими? Бунга амин бўлиш учун Seven jade’нинг Ўзбекистондаги расмий офиси сифатида кўрсатилган манзил – Шота Руставелли кўчаси 104-уйга бордик.

Давлат реестрида “Seven jade manufacturing” МЧЖ манзили сифатида ҳам айни шу жой кўрсатилган. Қолаверса, молиявий пирамида платформасининг “мижозларга хизмат кўрсатиш ходими” локация орқали шу манзилни қолдирди. Шунингдек, у “хотиржам бўлишимизни, ҳаммаси қонуний эканини” эслатиб ўтди.

“Golden cash” иши такрорланмасин

Ўзбекистонда МЧЖ очиб, одамларни чув тушириш ҳолати янгилик эмас. Масалан, 10 ойда 2 минг нафардан ортиқ ўзбекистонликнинг қарийб 6 млн долларини қўлга киритган “Golden cash” иши.

Ўшанда Украина фуқароси бўлган Максим Мунтян номига  “Golden cash store” МЧЖ давлат рўйхатидан ўтказилган, сўнгра одамлар ихтисослашган дўконларда соатлар ва заргарлик буюмлари чакана савдоси ниқоби остида чув туширилганди.  

Seven jade ҳам айни шу ҳолатга ўхшаш: одамлар пулини очиқчасига молиявий пирамида кўринишида жалб қилмоқда.

“Golden cash” иши қайта такрорланмаслиги учун тегишли органлар, жумладан, киберхавфсизлик тезкор равишда Seven jade фаолиятини ўрганиб, бу схема ортида турганларни аниқлаши зарур. Уларнинг “мушугига ҳеч ким пишт демаслиги” кўплаб одамларнинг алданишига олиб келиши мумкин.

Эслатиб ўтамиз, Жиноят кодексининг 188-1-моддасига кўра, пул маблағларини ва (ёки) бошқа мол-мулкни жалб этишга доир ноқонуний фаолият билан шуғулланиш жиноий жавобгарликка сабаб бўлади. Бундай қилмиш учун 10 йилгача озодликдан маҳрум қилиш жазоси назарда тутилган.

Жиноят процессуал кодекси талабига кўра, Жиноят кодексининг 188-1-моддаси билан жиноят иши қўзғатиш учун жабрланувчининг аризаси талаб қилинмайди.