ЖЧда 11-кун. Кабо-Верде эртаги давом этди, Салоҳда рекорд

Жаҳон чемпионатининг иккинчи тури экваторга етиб келди: 21 ва 22 июн кунги баҳсларда Миср Янги Зеландия устидан иродали ғалабага эришди (3:1), Кабо-Верде жамоаси эса яна бир сенсация кўрсатиб, Уругвайдан ҳам очко тортиб олди (2:2), Испания Саудия Арабистонини йирик ҳисобда тор-мор этди (4:0), Белгия эса Эрон дарвозасига йўл тополмади (0:0).

Майдон ташқарисида ҳам шов-шувли воқеалар давом этмоқда. Парагвай миллий жамоаси сафида соат «ўғриси» аниқланди, испанлар ҳужумчиси Ферран Торреснинг кутилмаган танқидчиси пайдо бўлди.

Испанлар ўзига келмоқда

Испания – Саудия Арабистони 4:0
Голлар: Ямал, 10 (1:0). Ойярсабал, 21 (2:0). Ойярсабал, 24 (3:0). Ал-Тумбуктий, 49 – автогол (4:0)
Испания: Симон, Ляпорт, Кубарси, Кукуреля, Порро, Родри, Педри (Руис, 70), Олмо (Мерино, 61), Баэна (Уилямс, 61), Ямал (Торрес, 46), Ойярсабал (Пино, 46)
Саудия Арабистони: Ал-Увайс, Лажамий, Ал-Амрий (Абулшамат, 60), Ал-Тумбуктий, Ал-Арбий, Абдулҳамид, Н. Ад-Довсарий (Ал-Ғаннам, 90), Ал-Ҳайбарий (Канно, 46), С. Ад-Довсарий, Аж-Жувайр (Ал-Ҳамдон, 46), Ал-Бурайкан (Ҳожи, 60)
Огоҳлантиришлар: С. Ад-Довсарий, 30. Канно, 60

Испания миллий жамоаси турнир стартида Кабо-Вердедан келган дебютантлар билан дуранг ўйнаб (0:0), жиддий муваффақиятсизликка учраганди. Луис де ла Фуэнте шогирдлари 90 дақиқа давомида 40 ёшли дарвозабон Возиня дарвозасини ишғол этишнинг уддасидан чиқолмаганди.

Бу бетараф мухлислар учун чиройли тарихга айланди, аммо испанлар жамоаси мухлислари буни шармандалик деб баҳолаб, футболчиларни қаттиқ танқид остига олишди. Натижада футболчилар бор аламини Саудия Арабистонидан олиш учун майдонга тушишди ва ўйин тақдири биринчи бўлимдаёқ ҳал қилинди.

29 ёшли Микел Ойярсабал қисқа вақт ичида 2 гол ва 1 ассист муаллифига айланди ва 45 дақиқа ўйнаганига қарамай, ўйиннинг энг яхши футболчиси деб топилди. Бундан ташқари, жароҳатидан тузалиб, сафга қайтган Ламин Ямал ҳам ўз ҳисобига гол ёзиб қўйди. 18 ёшли испаниялик учун бу жаҳон чемпионатларидаги биринчи гол бўлди. Энди у турнир тарихидаги энг ёш тўпурарлар рўйхатида Мессини (аргентиналик форвард 2006 йил серблар дарвозасига гол урганида ундан 15 кунга каттароқ бўлган) ортда қолдириб, саккизинчи ўринга жойлашди.

«Барчаси биз хоҳлагандек бўлди: учта гол устунлиги менга дам олиш имконини берди – идеал. Мен ҳар доим жаҳон чемпионатида қатнашишни орзу қилганман ва стартда тушган биринчи ўйинингдаёқ гол уриш – бу орзунинг ушалиши. Олдинги турнирни мактаб ўқувчиси сифатида томоша қилгандим, энди эса бу ерда, онам ва оилам трибуналарда бўлганида гол уряпман. Бу орзунинг ушалиши», – деган Ямал ФИФА сайти учун берган интервюсида.

Кабо-Верде эртаги давом этмоқда

Уругвай – Кабо-Верде 2:2
Голлар: Ленини, 21 (0:1). Арауҳо, 44 (1:1). Каноббио, 45+6 (2:1). Э. Варела, 61 (2:2)
Уругвай: Муслера, Касерес, Оливера, Санабрия, Г. Варела, Угарте (Де ла Крус, 70), Бентанкур, Валверде, Арауҳо (Родригес, 81), Каноббио, Виняс (Нунес, 70)
Кабо-Верде: Возиня, Диней Боржес, Лопеш, Лопеш Кабрал, Морейра, Ленини (Л. Дуарте, 70), Монтейру (Самеду, 80), Телму Арканжу (Д. Дуарте, 46), Родригеш (Э. Варела, 58), Мендеш да Граса, Беншимол (Да Кошта, 58)
Огоҳлантиришлар: Бентанкур, 20. Оливера, 58 – Лопеш Кабрал, 5. Диней Боржес, 90

Ўтган турда Кабо-Верде жамоаси турнирнинг асосий сенсациясини қайд этишганди – ушбу жамоа номдор Испанияни тўхтатиб (0:0), дунё бўйлаб юз минглаб мухлислар меҳрини қозонганди. Шу билан бирга, кўпчилик Уругвайга қарши ўйинда оролликлар жамоасининг эртаги якунланишини тахмин қилаётганди. Аммо жамоа футболчилари  иккинчи ўйинга ўзига янада кўпроқ ишонган ҳолда чиқиб келди ва биринчи бўлиб ҳисобни очишга муваффақ бўлди. Жамоанинг жаҳон чемпионатлари тарихидаги тарихий голига Россия чемпионати вакили муаллифлик қилди: «Краснодар» яримҳимоячиси Кевин Ленини жарима зарбасини тўғридан тўғри голга айлантирди.

Шундан кейин Марсело Биелса шогирдлари диққатни жамлаган ҳолда кетма-кет ҳужумлар уюштира бошлади ва бўлим якунида бу ўз самарасини берди: дастлаб Возиняни ўз жамоадошлари қийин аҳволда қолдиришди – у ўз ҳимоячиси бошидан келган зарбани қайтариш учун чап томонга ташланди, тўп устунга тегиб, дарвозабон майдончасига қайтди ва у ерга етиб келган Максимилиано Араухо мувозанатни тиклади. Биринчи бўлимга қўшиб берилган дақиқаларда эса Агустин Каноббио жанубий америкаликларни ҳисобда олдинга олиб чиқди.

Аммо уругвайликлар ғалабали ҳисобни ушлаб қола олишмади – жамоа 61-дақиқада йўқ жойдан ўзига гол олиб келди. Ҳимоячилар аут ижро этишда сусткашликка йўл қўйишди ва рақиб босими остида тўп йўқотилди. Турнирдаги 40 ёшли яна бир дарвозабон Фернандо Муслера эса вазиятни тузатиш учун жарима майдонидан чиқиб келди, аммо тўпга улгурмади: Элио Варела тўпни дарвозабон ёнидан ўтказиб, бўш дарвозани ишғол этди – 2:2.

Испания билан ўйин қаҳрамони бўлган Возиня эса ниҳоят навбатдаги натижани ўз онаси билан нишонлашга муваффақ бўлди. У виза билан боғлиқ муаммолар туфайли биринчи ўйинга етиб кела олмаганди. Аммо Кабо-Верденинг илк муваффақиятидан кейин барча юридик масалалар ҳал қилинди.

Белгия гуруҳда қолиб кетиши мумкин

Белгия – Эрон 0:0
Белгия: Куртуа, Меҳеле, Нгой, Де Кюйпер, Мене (Кастан, 58), Тилеманс, Раскин (Ванакен, 58), Де Брейне (Фернандес-Пардо, 87), Троссар, Салемакерс (Лукебакио, 58), Лукаку (Теат, 73)
Эрон: Бейранванд, Халилзода, Хонизодагон, Неъматий, Ҳожисафий (Муҳаммадий, 66), Гардоний (Жаҳонбахш, 46), Иззатуллоҳий (Ҳусайнзода, 85), Қуддус (Муғанлу, 79), Муҳибий (Торобий, 66), Ризоян, Торимий
Огоҳлантиришлар: Лукаку, 3 – Иззатуллоҳий, 33
Четлатиш: Нгой, 66

Белгияликлар ҳам иккинчи турга испанлар билан бир хил ҳолатда етиб келишганди. Турнир стартида Руди Гарсия шогирдлари Мисрни енга олмаган (1:1) ва иккинчи турда бу хатони тузатиш талаб этиларди. Аммо бу сафарги рақиб анойилардан эмасди. Эронликлар майдон ташқарисидаги жиддий муаммоларга қарамай, биринчи турда ёмон ўйин кўрсатмаган ва Янги Зеландия билан ўйинда очко қўлга киритганди (2:2).

Майдонда белгияликлар савия борасида устунлигини намойиш этди ва 90 дақиқа давомида рақиб дарвозаси томон 23 бор зарба йўллади ва иккинчи бўлимда сон жиҳатдан озчилик бўлиб қолганига қарамай, ўйиннинг 70 фоиз вақтида тўпга эгалик қилишди.

Лекин европаликлар барибир гол ура олишмади – эронликлар дарвозабони Алиризо Бейранванд шу кун фаолиятидаги энг яхши ўйинлардан бирини ўтказди. У жами етти сейв ижро этди, хусусан, 60-дақиқада Максим Де Кюйпернинг жуда яқин масофадан йўллаган зарбасини қайтарди.

Якунда айнан Бейранванд ўйиннинг энг яхши футболчиси деб топилди. Белгия эса қаторасига иккинчи ўйинда муваффақиятсизликка учради – энди жамоа гуруҳдан чиқиш учун учинчи турда Янги Зеландияни мағлуб этиши талаб этилади. Дуранг натижа ҳам жамоани гуруҳда қолдириши мумкин.

Салоҳ ва Ко тарихий ғалабага эришди

Янги Зеландия – Миср 1:3
Голлар: Сармен, 15 (1:0). Зико, 58 (1:1). Салоҳ, 67 (1:2). Трезеге, 82 (1:3)
Янги Зеландия: Крокомб, Боксалл, Сармен, Какаче (Томас, 76), Пэйн (де Врис, 85), Белл, Стаменич, Сингҳ (Рэнделл, 76), Жаст (Биндон, 85), Макковатт (Олд, 66), Вуд
Миср: Шубайр, Ёсир Иброҳим, Фати (Рабиа, 41), Аҳмад Фотиҳ, Хани, Лашин, Атея, Салоҳ (Абдулмажид, 84, Абдул Муним, 90+9), Ашур (Сайид, 84), Зико (Трезеге, 76), Мармуш (Абдулкарим, 76)
Огоҳлантиришлар: Сингҳ, 20. Макковатт, 34 – Лашин, 17

Ўйин стартида мисрликлар яхшироқ ҳаракат қилишди, ташаббусга эгалик қилишди, аммо биринчи бўлиб гол ўтказиб юборишди: 15-дақиқада бурчак зарбаси ижро этилганидан кейин янги зеландияликлар яримҳимоячиси Финн Сармен ҳисобни очди. Шундан кейин ўйин суръати пасайди ва бўлим охиригача дарвозалар қаршисида хавфли вазиятлар юзага келмади. Лекин танаффусдан кейин Ҳуссам Ҳасан шогирдлари майдонга буткул ўзгача кайфиятда чиқиб келишди ва нима қилиб бўлса ҳам уч очкони қўлга киритиш учун олдинга ташланишди.

Мисрликларнинг ўйиндаги устунлиги кўп ўтмай ҳисобда ҳам акс этди. Янги Зеландия футболчилари шиддатли босимга дош бера олишмади ва уч марта гол ўтказиб юборишди: дастлаб Мустафо Зико ҳисобни тенглаштирди, кейин Муҳаммад Салоҳ ғалаба голини урди, ўйин охирларига бориб у Маҳмуд Ҳасан Трезегени голли пас билан таъминлади. Бу орқали тажрибали форвард жаҳон чемпионатининг бир ўйинида ҳам гол, ҳам голли узатма муаллифи бўлган энг кекса ёшли (34 ёш-у 7 кунлик) футболчига айланди.

Бу ғалаба Миср учун жаҳон чемпионатлари тарихидаги илк ғалаба бўлди – «фиръавнлар» жамоаси бунгача учта ўйинда дуранг ўйнаб, беш марта ютқазганди. Энди айнан улар 4 очко билан G гуруҳида пешқадам бўлиб олишди. Сўнгги турни жамоа 27 июн куни Эронга қарши ўтказади.

Парагвайлик ўғри

Гуруҳ босқичи иккинч турида Парагвай ва Туркия ўртасидаги ўйинда (1:0) ғаройиб эпизод рўй берди – ўйиндаги ягона гол муаллифи, жанубий америкаликлар жамоаси яримҳимоячиси Матиас Галарса ўйин вақтида ҳакамнинг соатини ўзлаштириб олди.

Ҳодиса танаффус арафасида рўй берган: майдонда футболчилар ўртасида баҳс юзага келган вақтда уларни ажратишга киришган салвадорлик бош ҳакам Иван Бартон аксессуарини тушириб қўйган. Галарса эса бундан фойдаланиб, уни ердан олган ва уни қўлига тақиб олган ва бир неча дақиқа давомида уни тақиб юрган. Аммо якунда гаджетни эгасига қайтариб, «ўғрилик» учун жазодан қутулиб қолган.

Худди шу ўйинда яна бир эътиборли воқеа рўй берганди – футбол тарихида илк бор футболчи рақиб билан баҳслашув вақтида оғзини қўли билан ёпгани учун майдондан четлатилди. Бундай қатъий қоида жаҳон чемпионати арафасида жорий этилганди ва унинг илк қурбони парагвайлик Мигел Алмирон бўлди. У 45+3-дақиқада туркиялик Мерт Мулдурга қарата айтган гапини яшириш учун қилган ҳаракати туфайли майдондан четлатилди.

Ферран Торреснинг кутилмаган ҳейтери

Испаниянинг жаҳон чемпионатидаги илк ўйини шу қадар муваффақиятсиз чиқдики, де ла Фуэнте жамоасидаги футболчиларни ўз қариндошлари ҳам танқид қилишди. Хусусан, ҳужумчи Ферран Торреснинг бобоси шов-шувли интервю берди – у машҳур набирасини бутун мамлакат олдида мазах қилган.

Саудия Арабистонига қарши ўйин олдидан олинган интервюда у шундай деган: «Агар Кабо-Верде билан ўйиндаги каби ўйнаш – шармандалик бўлади! Ҳисобми? Менимча, 1:0 . Бу голни Ферран урадими? Йўқ, бу жуда қийин. Мен уни жаҳон чемпионатида кўришдан мамнун бўламанми? Йўқ, мен эмас. Рафиқам эса ҳа, у набираси учун шам ёқяпти», – деган у.

Бундан ташқари, у шундай қўшимча қилган: «Ферран «Барселона»да ўйнаши менга ёқадими? Йўқ, мен уни «Леванте»да кўришни истардим», – дея қайд этган кекса ёшли мухлис.

Торреснинг бобоси ҳазиллашган бўлса ҳам, унда набираси устидан кулиш учун сабаблар етарли. Ферран – Испаниянинг бу чемпионатда энг кўп муҳокама қилинаётган футболчиларидан бири. Кабо-Вердега қарши ўйинда у икки марта 100 фоизлик имкониятни қўлдан чиқарди, Саудия Арабистони билан ўйинда ҳам дарвозабон билан яккама-якка вазиятда тўғри зарба бера олмади. 90+2-дақиқада барибир дарвозани ишғол этганида эса, гол офсайд туфайли бекор қилинди.

Шундай экан, 27 июн куни Уругвайга қарши кечадиган навбатдаги ўйин олдидан бобоси яна бир қизиқарли интервю берса ажаб эмас.

Навбатдаги ўйинлар

22 июн куни кечқурун ва 23 июнга ўтар кечаси яна икки гуруҳда 2-тур учрашувлари ўтказилади.

• 22.00. J гуруҳи. Аргентина — Австрия
• 02.00. I гуруҳи. Франция — Ироқ
• 05.00. I гуруҳи. Норвегия — Сенегал
• 08.00. J гуруҳи. Иордания — Жазоир