Мексикада ғалабани нишонлаш чоғида 4 киши ҳалок бўлди

Футбол бўйича Мексика миллий жамоасининг жаҳон чемпионати 1/16 финалида Эквадор устидан қозонган ғалабасини (2:0) нишонлаш чоғида бир миллиондан ортиқ киши Мехико шаҳри кўчаларига чиққан. Юзага келган тиқилинч оқибатида тўрт киши ҳалок бўлган: 19 ёшли қиз, 48 ёшли аёл, 44 ёшли эркак ва яна катта ёшли эркак.

Мехико соғлиқни сақлаш бошқармаси маълумотига кўра, уч киши тиқилинчда бўғилиб қолган, яна бир кишининг юраги хуруж қилган.

Шаҳар расмийларига кўра, энг кўп одам Мехико шаҳри марказида, Мустақиллик устунлари майдонида йиғилган. Бу қадар кўп одам тўпланишининг сабаби Эквадор билан ўйиндаги ғалаба Мексика миллий жамоаси 1986 йилдан буён жаҳон чемпионати плей-офф босқичларида илк бор ғалаба қозониши эди.

Мехико шаҳри мэри Клара Бругада қурбонларнинг оила аъзоларига таъзия изҳор этиб, уларга имкон қадар ёрдам кўрсатилишини ваъда қилган. У шунингдек мухлисларни ғалабани «ҳар доим масъулият билан, бошқаларни ҳурмат қилган ҳолда нишонлаш»га чақирган.

Соғлиқни сақлаш департаментига кўра, фавқулодда хизматлар шаҳарнинг турли ҳудудларида, Пасео-де-ла-Реформа шоҳкўчаси бўйида ҳушини йўқотган уч кишига тиббий ёрдам кўрсатганини маълум қилган.

«Биринчи тиббий ёрдам ва юрак-ўпка реанимацияси ўтказилгандан сўнг, жабрланганлар ихтисослаштирилган даволаш учун тиббиёт муассасаларига ўтказилди», – дейилади пойтахт соғлиқни сақлаш департаменти хабарида.

Лекин уларнинг учаласи ҳам шифохонада жон берган, ўлим сифатида нафас етмай қолиши кўрсатилган. Уларнинг шахси қариндошлари томонидан тасдиқланган.

Ўйин бошланишидан олдинроқ Мехико мэри Клара Бругада шаҳар марказидаги Мустақиллик устунлари майдонига келишни режалаштирган мухлислардан бошқа жойни танлашни сўраганди, чунки бу вақтга келиб майдон аллақачон одамлар билан тўлиб-тошганди.

Хабар қилишларича, тиқилинч вақтида нафаси қисиб қолган яна ўнлаб кишиларга тиббий ёрдам кўрсатилган.

Ижтимоий тармоқларда тарқалган кадрларда бошқалар байрам қилаётгани фонида тиббиёт ходимлари аҳволи оғирлашиб қолган одамлар ҳаётини сақлаб қолиш учун курашаётганини кўриш мумкин.

Мехико агломерациясида 20 миллиондан ортиқ киши истиқомат қилади, бу уни дунёнинг аҳоли энг тиғиз жойлашган шаҳарларидан бирига айлантирган.

Мексика миллий жамоаси Эквадор устидан қозонилган ғалабадан кейин 1/8 финалга чиқди. Бу босқичда турнир мезбонларига Англия миллий жамоаси рақиб бўлади.