Пойтахтда қалбаки валюта савдоси фош этилди

Тошкент шаҳрида ҳуқуқни муҳофаза қилувчи органлар томонидан ўтказилган тезкор тадбирда қалбаки АҚШ доллари ва миллий валютани сотиш билан шуғулланган шахслар қўлга олинди. Улар ашёвий далиллар билан ушланган бўлиб, ҳолат юзасидан жиноят иши қўзғатилди.

Фото: Прокуратура департаменти

Бош прокуратура ҳузуридаги департаментнинг Шайхонтоҳур тумани бўлими ҳамда бошқа ҳуқуқни муҳофаза қилувчи органлар ходимлари ҳамкорлигида ўтказилган тезкор тадбирда қалбаки валюта муомаласига чек қўйилди.

Терговга қадар текширув материалларига кўра, фуқаролар М.А., М.А. ва Б.Б. фуқаро Б.Л.га қалбаки 10 минг АҚШ доллари ва 20 миллион сўмни 14 миллион сўм эвазига сотган вақтида қўлга олинди.

Шунингдек, улар қалбаки яна 10 минг АҚШ долларини фуқаро Ў.А.га 8,4 миллион сўмга сотган вақтида ҳам ҳуқуқни муҳофаза қилувчи органлар томонидан ашёвий далиллар билан ушланган.

Мазкур ҳолатлар юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) билан жиноят иши қўзғатилган.

Ҳозирда ушбу жиноят иши доирасида тергов ҳаракатлари олиб борилмоқда.