CNBC ва Statista томонидан тузилган глобал рўйхат — финтех соҳасида нуфузли баҳолаш мезонларидан бири саналади. Баҳолаш бизнеснинг молиявий ва операцион кўрсаткичлари, жумладан, даромад, рентабеллик, кредит ва депозит портфелларининг ўсиш суръати, транзакциялар ҳажми ҳамда бозор улушининг чуқур таҳлили асосида амалга оширилади.
TBC Uzbekistan’нинг кетма-кет иккинчи йил ушбу рейтингдан ўрин олиши компаниянинг барқарор ва даромадли ўсиш моделини тасдиқлайди. 2020 йилда ишга туширилганидан буён экотизимнинг ойлик фаол фойдаланувчилари сони 6 миллиондан ошди, бренд эса мамлакатдаги энг таниқли учта молиявий хизмат бренди қаторидан жой олди. Бугунги кунда компания Ўзбекистоннинг энг йирик 10 та чакана банки қаторига киради, тўловлар бозорининг 20 фоиздан ортиғини эгаллайди ҳамда истеъмол кредитлари сегментида етакчилик қилади.
Чакана бизнес билан биргаликда экотизим бизнес учун хизматларини ҳам кенгайтирмоқда. TBC Biznes — Ўзбекистондаги кичик ва ўрта бизнес учун мўлжалланган илк тўлиқ рақамли хизмат бўлиб, 2024 йил декабр ойида ишга туширилганидан буён 67 мингдан ортиқ корпоратив мижозни жалб қилди. Бугунги кунда бизнес кредитларининг умумий кредит портфелидаги улуши 18 фоизга етди.
Ника Курдиани, CEO TBC Uzbekistan: “2025 йилда ушбу рейтингдан ўрин олган Ўзбекистондаги илк компанияга айландик, бугун эса бу мақомни яна бир бор тасдиқламоқдамиз. Бу Ўзбекистоннинг дунёдаги энг жадал ривожланаётган бозорлардан бири сифатидаги жозибадорлиги тобора ортиб бораётганидан, шунингдек, мамлакатдаги етакчилигимиз ва барқарор, даромадли бизнесни ривожлантириш салоҳиятимиздан далолат беради. Ўтган йил давомида биз экотизимни янги босқичга олиб чиқдик: TBC Biznes’ни чакана йўналишимиз даражасига қадар кенгайтирдик ҳамда илғор сунъий интеллект ечимлари ёрдамида мижозлар тажрибасини тубдан ўзгартирдик. Бу ишларимиз CNBC ва Statista томонидан эътироф этилганидан ҳамда Ўзбекистоннинг глобал майдондаги мавқейини мустаҳкамлашда муҳим рол ўйнашда давом этаётганимиздан мамнунмиз”.
Экотизим ривожланишининг муҳим омилларидан бири сунъий интеллектни жорий этиш бўлиб қолмоқда. TBC Uzbekistan мижоз тажрибасининг барча босқичларида сунъий интеллект ечимларини жорий этмоқда. Яқинда компания ўзбек тилидаги ўзининг катта тил моделлари (LLM) асосида яратилган Марказий Осиёдаги илк банк сунъий интеллект ёрдамчиси — Лолани ишга туширди.
