АҚШ Сенати 28 июл куни кечқурун ўтказилган овоз бериш жараёнида Россия ва Эронга қарши янги санкциялар ҳақидаги қонун лойиҳасини кейинги босқичда кўриб чиқишга рухсат берди. Ҳужжатни 86 нафар сенатор қўллаб-қувватлади, 12 нафари эса қарши овоз берди. Республикачилар ва демократлар овоз беришдан аввал қонун лойиҳасини биргаликда қўллаб-қувватлашга келишиб олган.
Овоз бериш АҚШнинг яқинда вафот этган республикачи сенатори Линдси Грэм билан видолашув маросимидан бир неча соат ўтиб бўлиб ўтди. Грэм ушбу қонун лойиҳасининг асосий муаллифларидан бири ҳисобланади. Маросимда Украина президенти Володимир Зеленский ҳам иштирок этди. У шу куни Вашингтонда АҚШ президенти Доналд Трамп билан ҳам учрашди.
Зеленский Сенатдаги овоз бериш жараёнида ҳам иштирок этди. У Telegram саҳифасида икки партия сенаторлари билан учрашиб, Украинанинг ҳаво ҳужумидан мудофаа тизимлари ва бошқа хавфсизлик масалаларини муҳокама қилганини маълум қилди. Шунингдек, у 86 нафар сенаторнинг қонун лойиҳасини қўллаб-қувватлаганини муҳим қадам деб баҳолаб, бу Линдси Грэм режаларини амалга ошириш йўлидаги илк босқич эканини таъкидлади.
Қонун лойиҳасига кўра, АҚШ президентига Россиядан импорт қилинадиган товарларга 500 фоизлик бож жорий этиш ваколати берилади. Шу билан бирга, Россия нефти, табиий гази ёки уранини сотиб оладиган, ёхуд Москвага санкцияларни четлаб ўтишда ёрдам берадиган мамлакатлардан келадиган импорт маҳсулотларига ҳам 100 фоизлик тариф жорий қилиш имконияти яратилади. Бу ваколатлар президентга беш йил муддатга берилиши кўзда тутилган.
Доналд Трамп аввалроқ 2025 йилда тайёрланган мазкур қонун лойиҳасини қўллаб-қувватлашдан бош тортган эди. У санкцияларни кучайтириш ёки бекор қилиш бўйича президент ваколатларини кенгайтиришни талаб қилган. Линдси Грэм вафотидан сўнг ҳамда сенаторлар томонидан ҳужжатга айрим ўзгартишлар киритилгач, Оқ уйнинг позицияси ўзгарди.
Кутилишича, қонун лойиҳаси бўйича якуний овоз бериш шу ҳафта охирига қадар ўтказилади. Бироқ ҳужжат Сенатдан ўтган тақдирда ҳам, АҚШ Вакиллар палатаси ёзги таътилга чиққанлиги сабабли у сентябрдан аввал кучга кириши кутилмаяпти.
