«Верстка» нашрининг Арманистондаги риэлторларга таяниб ёзишича, Россия фуқароларининг мамлакатдаги уй-жойларни ижарага олиш ва сотиб олишга қизиқиши 2022 йилда кузатилган даражага яқинлашган.
Риэлторлардан бири айтишича, аввалги йилларда унинг мижозларининг асосий қисмини Ереванда аллақачон яшаб келаётган россиялик муҳожирлар ташкил этган бўлса, ҳозирда мижозларнинг қарийб 80 фоизи Арманистонга яқинда келган ёки яқин вақт ичида кўчиб келишни режалаштираётган Россия фуқароларидир.
Мутахассисларнинг таъкидлашича, талабнинг янги тўлқини май ойидаги байрамлардан кейин бошланган ва ҳозиргача кучайиб бормоқда. Кўплаб мижозлар август ойи охири ва сентябр ойи учун квартира изламоқда. Риэлторлардан бири бу ҳолатни Россия Давлат думасига сайловлар 18–20 сентябр кунлари ўтказилиши арафасида айрим фуқаролар мамлакатни тарк этишга интилаётгани билан изоҳлади.
Арманистон россияликлар учун энг қулай эмиграция йўналишларидан бири ҳисобланади. 2017 йилдан буён Россия фуқаролари мамлакатга ички паспорти билан кириши мумкин. Шунингдек, ишлаш, ўқиш, тадбиркорлик ёки оилавий алоқалар асосида вақтинчалик яшаш рухсатномасини расмийлаштириш имконияти ҳам мавжуд.
Бу хабар Украина президенти Володимир Зеленскийнинг Россия ҳокимияти 2026 йил кузида сафарбарликни кенгайтиришни режалаштираётгани ҳақидаги баёноти ортидан янгради. Зеленскийнинг таъкидлашича, Россия президенти Владимир Путин янги фуқароларни урушга жалб қилишга тайёргарлик кўрмоқда. Шунингдек, у июнь ойидан бери Воронеж вилоятида Шимолий Кореядан келадиган 30 минг нафар ҳарбийни қабул қилишга тайёргарлик кетayotganини ҳам иддао қилди.
Москва ушбу баёнотларга расмий муносабат билдирмаган. Шу билан бирга, Арманистондаги кўчмас мулк бозори ва ижара нархларидаги ўсиш россияликлар томонидан мамлакатга кўчиб келишга қизиқиш яна ортиб бораётганини кўрсатмоқда.
