Bloomberg агентлиги маълум қилишича, Сенатдаги икки партия вакиллари Россия ва Эронга қарши янги санкциялар назарда тутилган қонун лойиҳаси юзасидан келишувга эришган.
Лойиҳада АҚШ президентига Россиядан импорт қилинадиган товарларга 500 фоизлик бож жорий этиш ваколати берилиши кўзда тутилган. Шу билан бирга, Россия нефти, табиий гази ёки уранини харид қиладиган, ёхуд Москвага амалдаги санкцияларни четлаб ўтишда ёрдам берадиган мамлакатлардан импорт қилинадиган маҳсулотларга ҳам 100 фоизгача тариф белгилаш имконияти яратилади.
Ҳужжатга кўра, мазкур ваколатлар қонун кучга кирганидан кейин беш йил давомида амал қилади. Қонун лойиҳаси муаллифларидан бири яқинда вафот этган республикачи сенатор Линдси Грэм ҳисобланади.
Bloomberg қайд этишича, ушбу ташаббус АҚШнинг Хитой ва Ҳиндистон билан савдо муносабатларига таъсир кўрсатиши мумкин. Зеро, бу икки давлат Россия энергетика ресурсларининг энг йирик харидорлари қаторига киради. Шу сабабли айрим демократ сенаторлар президентга бундай кенг ваколатлар берилишидан хавотир билдирмоқда.
Маълум қилинишича, қонун лойиҳаси шу ҳафтаёқ Сенатда қабул қилиниши мумкин. Бироқ у сентябрдан аввал кучга кирмайди. Чунки АҚШ Конгрессининг қуйи палатаси — Вакиллар палатаси ёзги таътилга чиққан.
Доналд Трамп аввалроқ 2025 йилда тайёрланган ушбу қонун лойиҳасини қўллаб-қувватлашдан бош тортган эди. У Россия ва Эронга нисбатан санкцияларни кучайтириш ёки юмшатиш бўйича президент ваколатларини янада кенгайтиришни талаб қилган. Бироқ Линдси Грэм вафотидан кейин ҳамда қонун лойиҳасига айрим ўзгартишлар киритилгач, Оқ уй бу ташаббусни қўллаб-қувватлашга қарор қилди.
Трамп маъмурияти аввал ҳам Россияни Украинадаги урушни тугатиш бўйича музокараларга ундаш мақсадида санкция босимини кучайтиришга уринган эди. Бироқ Эрон билан можаро пайтида Ҳўрмуз бўғози атрофидаги вазият кескинлашгач, жаҳон бозорида энергия нархларининг кескин ошиб кетишининг олдини олиш мақсадида Россия нефти билан боғлиқ айрим операцияларга нисбатан чекловлар вақтинча юмшатилган эди.
