Келишув дастлаб 30 июль куни кечқурун АҚШ президенти Доналд Трамп томонидан эълон қилинди. Бу Тинчлик кенгаши ва воситачи давлатлар сулҳнинг кейинги босқичи учун йўл харитаси якунлаганини маълум қилгач юз берди.
«Бугун Тинчлик кенгаши Ҳамас ва Ғазодаги барча бошқа қуролли гуруҳларни ТЎЛИҚ ҚУРОЛСИЗЛАНТИРИШ бўйича ТАРИХИЙ келишувга эришди. Бу барқарор ТИНЧЛИК ва ХАВФСИЗЛИК сари қўйилган улкан қадамдир», деб ёзди Трамп.
Трамп келишув босқичма-босқич амалга оширилишини ва қуролсизланиш жараёни ривожлангани сари Исроил қўшинлари олиб чиқиб кетилишини айтди. «Келишув эҳтиёткорлик билан тузилган босқичларда амалга оширилади. Қуролсизланиш якунлангач, Исроил кучлари олиб чиқилади ва Халқаро барқарорлаштириш кучлари …янги Фаластин полиция кучлари билан биргаликда ишлайди», деб ёзган у.
Al Jazeera'нинг ёзишича, иккинчи босқичда шартларга риоя қилинишини таъминлашга қаратилган музокаралар учун Миср – АҚШ, Қатар ва Туркия вакилларига мезбонлик қилади.
Қуролсизланиш босқичлари
Қуролсизланиш бўйича режада қуйидагилар белгиланган:
ҲАМАС қуролларини рўйхатга олиш жадвали 14 кун ичида тайёрланиши керак. Муддатни узайтиришга фақат халқаро текширув комиссияси ва барча иштирокчи томонлар рози бўлгандагина рухсат берилади.
Фаластин Миллий Қўмитаси хатлов ва сақлаш жараёнини назорат қилади ҳамда амалга оширади. У Фаластин гуруҳлари иштирокида Ғазода қуролларни ушлаб турувчи, сақловчи ёки назорат қилувчи ягона органга айланади.
Исроилга ёки фаластинлик бўлмаган бошқа томонларга ҳеч қандай қурол топширилмайди.
Халқаро текширув комиссияси, халқаро кучлар ва янги Фаластин полицияси Исроил қўшинларининг белгиланган чизиқларга босқичма-босқич олиб чиқилиши фонида қуролсизланишни назорат қилади.
