Италиянинг Thaon di Revel кемаси Ўртаер денгизида Евроиттифоқ Россия соя флотига алоқадор деб ҳисоблаган Toa Payoh танкерини тўхтатди, деб хабар берди Италия мудофаа вазирлиги.
Операция Италиянинг Пантеллерия ороли ғарбида ўтказилган. Танкер Бениндан Истанбул томон сузаётган бўлган ва у Евроиттифоқ санкциялари остида, деб ёзмоқда Reuters. Италия мудофаа вазирлигининг билдиришича, кема капитани ҳарбийлар билан ҳамкорлик қилишдан бош тортганидан сўнг унга вертолётдан ҳарбийлар гуруҳи ташланган.
Танкер икки соатга яқин вақт давомида кўздан кечирилган. Текширувда Греция кемаси ва Полша денгиз патрул самолёти ҳам иштирок этган. Италия ҳукумати текширув вақтида олинган ҳужжатларни ўрганмоқда.
Июн ойи бошларида евродипломатия раҳбари Кая Каллас Евроиттифоқ мамлакатлари ўз кемаларига Ўртаер денгизида ЕИ Россия соя флотига алоқадор деб ҳисоблаган хорижий танкерларни кўздан кечиришга рухсат берганини маълум қилганди. Июл охирларида Каллас «Россия соя флотига қарши кураш кучайгани»ни эълон қилди.
