Украина дрони пляжга қулади
3 август куни Краснодар ўлкасида Геленжик яқинидаги Архипо-Осиповка қишлоғига Украина дрони қулади. Дрон тўғридан тўғри дам олувчилар устига – пляжга қулаб тушган. Краснодар ўлкаси тезкор штаби маълумотларига кўра, ҳужумда етти киши, жумладан, уч нафар бола ҳалок бўлди. Украина дрони тинч аҳоли орасида яна 40 кишини жароҳатлаган, улардан 21 нафари касалхонага ётқизилган.
Маълум бўлишича, шаҳар раҳбари Алексей Богодистов ўша куни эрталаб дрон хавфи ҳақида хабар берган, орадан 10 дақиқа ўтгач хавф бекор қилинган.
Краснодар ўлкаси губернатори ҳужум фуқаролик инфратузилмасига қаратилганини ва пляжга дрон қолдиқлари қулаганини маълум қилди. Бироқ воқеа жойидан гувоҳлар томонидан олинган видеода пляжга бутун бошли дрон қулагани кўринади.
Айрим ҳарбий экспертлар эса дрон Россия ҳаво ҳужумидан мудофаа тизими ҳаракатлари туфайли пляжга қулаган бўлишини айтмоқда. Чунки дрон қулашидан олдин ўқ овозлари эшитилган, бу мобил ўт очиш гуруҳлари уни уриб туширган деган тахминларга олиб келмоқда.
Ҳозирча дроннинг аниқ нишони қайси нуқта бўлгани маълум эмас.
Аммо ўқ товушлари яқин атрофда қўриқланадиган объект борлигидан далолат беради. Айнан шу объект дрон нишони бўлган бўлиши мумкин.
«Агентство» нашрининг ёзишича, дрон қулаган пляж «Рассвет» дам олиш маскани рўпарасида жойлашган. У эса Россиянинг энг асосий ракета-космик корхоналаридан бири — «НПО машиностроения» филиалидир.
Бундан ташқари, Геленжик яқинида — Навалний фонди суриштирувларида чиққан Путиннинг машҳур саройи жойлашган. Дрон қулаган пляждан саройгача масофа 30 километрдан камроқ.
Душанба куни Украина дронлари, шунингдек, Москвадан шарқда жойлашган яна бир Wildberries омборига ҳужум қилди. Владимир вилояти губернаторига кўра, ёнғинни ўчиришга 203 нафар ўт ўчирувчи ва 67 та техника жалб қилинган. Ёнғин майдони 100 000 квадрат метрни ташкил этди: бу тахминан 14 та футбол майдонига тенгдир.
WB ҳужумни тасдиқлади ва барча ходимлар эвакуация қилинганини билдирди. Ҳужумда 3 киши жароҳатланган.
Дунайда сув сатҳи пасаймоқда
Венгрия ўзининг 44 йиллик тарихида биринчи марта Пакш атом электр станциясини ёпади.
«Олдимизда энг оғир беш кун турибди. Эртага Пакш АЭС энергия ишлаб чиқармайди, олдинда эса энг иссиқ кунлар кутилмоқда», деди бош вазир Петер Мадяр. Бу қарор Дунай дарёсида сув сатҳи 23 смгача пасайганидан кейин қабул қилинган.
Пойтахт Будапештдан 120 километр жанубда жойлашган ушбу станция ўз реакторларини совитиш учун Дунай сувидан фойдаланади. У Можаристонда ишлаб чиқариладиган электрнинг 40 фоиздан ортиғини таъминлайди.
Венгрия сув хўжалиги бошқармаси Германиядан Қора денгизгача оқиб ўтувчи Дунай дарёси сатҳи яқин кунларда янада пасайишини башорат қилмоқда. Аввалроқ Пакш атом электр станцияси қуввати пасайтирилган ва баъзи реакторлар ўчирилганди.
Дунай дарёсидаги қурғоқчиликнинг олдини олиш учун душанба куни Руминия ҳам дарёдаги катта қоятошни портлатиб юборди. Ушбу қоятош Руминияда ишлаб турган ягона ядровий реакторни совитиш учун сувни йўналтириб турганди.
Руминиядаги автомобил заводлари 19 августгача ишлаб чиқаришни тўхтатиб туришга ва ўз ихтиёри билан электр истеъмолини камайтиришга рози бўлди. Венгрияда ҳам ҳукумат мурожаатидан сўнг аҳоли ва компаниялар томонидан электр энергияси сарфи қисқартирилди.
Қўшни Сербия ҳам ГЭСлар фаолиятини сезиларли даражада камайтиришга мажбур бўлди. Хусусан, мамлакат электр энергияси ишлаб чиқаришининг тахминан 18 фоизини таъминлайдиган энг йирик иккита станция ўз қувватларини 20 ва 30 фоизгача пасайтирган.
Жазирама ва қурғоқчилик Европанинг катта қисмида дарёлар сув сатҳини пасайтириб, сув таъминоти билан боғлиқ хавотирларни кучайтириб юборди. Ушбу мисоллар бутун минтақадаги энергия инқирози кўламини яққол кўрсатувчи мисли кўрилмаган чоралардир.
25 штат Трамп маъмуриятини судга берди
Душанба куни АҚШнинг йигирма бешта штати сўнгги жорий этилган божлар юзасидан президент Доналд Трамп маъмуриятини судга берди. Уларнинг таъкидлашича, бу феврал ойида Олий суд томонидан бекор қилинган импорт солиқларини алмаштириш учун шунчаки баҳона бўлган.
Ўтган ой Қўшма Штатлар 59 та мамлакат ҳамда Европа Иттифоқига нисбатан 12 фоизгача божлар жорий этганди. Оқ уй ушбу давлатларни мажбурий меҳнат асосида ишлаб чиқарилган импорт маҳсулотларига қарши етарлича курашмаётганликда айблаган.
«Олий судда ютқазиб қўйгач, маъмурият янги божлар тўлқини орқали солиқларни ноқонуний равишда оширишга уринмоқда», деди даъво аризасини киритган Ню Йорк бош прокурори Летиция Жеймс.
Орегон бош прокурори Ден Рейфилд эса «ҳар бир қадамда мағлубиятга учраётганига қарамай, Трамп яна ишчи оилалар ва маҳаллий корхоналарга кўпроқ зарар етказишга уринаётганини» таъкидлади.
Ўзининг иккинчи муддатига киришганидан бери Трамп АҚШнинг савдо бўйича ҳамкорлари дунёдаги энг йирик иқтисодиётдан фойдаланиб қолаётганини айтмоқда. У бошқа давлатлар билан янги савдо келишувларига эришиш учун божлардан таъсир ўтказиш воситаси сифатида фойдаланмоқда.
Унинг маъмурияти Вашингтоннинг дўстларига ҳам, душманларига ҳам бирдек кенг қамровли — кўпинча ўта юқори даражадаги — божларни жорий этиш орқали глобал савдони остин-устун қилиб юборди.
Зилзила қурбонлари сони ошмоқда
Венесуэла расмийлари эълон қилган сўнгги маълумотларга кўра, июн ойи охирида содир бўлган қўшалоқ зилзила оқибатида ҳалок бўлганлар сони 6 125 кишига етди. Норасмий ҳисоб-китобларга кўра, 17 мингдан 30 минггача одам ҳанузгача бедарак йўқолган деб ҳисобланмоқда.
Венесуэлада жорий йил 24 июн куни 7,2 ва 7,5 магнитудали зилзилалар содир бўлиб, миллий фавқулодда ҳолатни келтириб чиқарганди.
Зилзила оқибатида 200 га яқин бино қулаб тушган. Уларнинг аксарияти энг кўп талафот кўрган қирғоқ бўйидаги Ла-Гуайра штатига тўғри келади.
Венесуэла президенти вазифасини бажарувчиси Делси Родригес сўзларига кўра, тозалаш ишлари давом этмоқда: ҳозиргача қарийб 350 минг тонна вайроналар тозаланган. Аммо бу БМТ томонидан ҳисобланган жами 2,1 миллион тонна вайроналарнинг атиги 16,5 фоизини ташкил қилади.
Расмийлар яна 16 мингдан ортиқ иншоотни хавф остида деб баҳоламоқда. Бу эса кўпчиликни уйларини тарк этишга мажбур қилди. Ҳозирда минглаб одамлар Ла-Гуайра ва Каракасдаги вақтинчалик бошпаналарда кун кечирмоқда.
Жума куни мамлакат қонун чиқарувчилари кўчмас мулкни ижарага олишни енгиллаштирувчи қонунни бир овоздан маъқуллади. Бу уйларидан айрилган қурбонларга ёрдам беришга қаратилган чорадир.
Россиянинг йирик кемаси Германия яқинига келди
Россия Шимолий флотининг энг йирик кемаларидан бири — сувости кемаларига қарши курашувчи «Адмирал Левченко» Германиянинг Фемарн ороли яқинида кўзга ташланди. Немис ОАВларига кўра, кема Баренс денгизидан Болтиқ денгизига ўтказилган.
Россия ҳукумати кеманинг ҳаракати ва унинг Болтиқ денгизидаги вазифалари ҳақида расман хабар бермаган. Тахминларга кўра, «Адмирал Левченко» – аввалроқ Фемарн-Белт бўғозида патрул хизматини ўтаган ва «фуқаролик флоти кемалари хавфсизлигини таъминлаган» худди шу тоифадаги кемани алмаштириши мумкин. Бу орқали асосан Россия нефтини ташийдиган «соя флоти» кемалари назарда тутилмоқда.
Июн ойи охирида худди шу ҳудуддан Шимолий флотга тегишли бўлган «Североморск» ўз позициясини тарк этганди. Эндиликда бу ерда қолган битта рус корветига «Левченко» ёрдамга келди.
Маълум қилинишича, ўзининг база портига қайтиш йўлида «Североморск» ҳарбий кемаси Германия кемасозлик заводида қурилган супер яхтани кузатиб борган. Уни Россия президенти Владимир Путин билан алоқадор дейишади. 2022 йилда АҚШ уни Россия раҳбариятига алоқадор актив сифатида санкциялар рўйхатига киритганди.
