Украинанинг SOCIS ижтимоий ва маркетинг тадқиқотлари маркази ўтказган сўровнома натижаларига кўра, агар президентлик сайлови яқин вақтда бўлиб ўтса, биринчи турда Володимир Зеленский 22,3 фоиз овоз билан биринчи ўринни эгаллайди. Ундан кейинги ўринда 21,4 фоиз билан Украина Қуролли кучларининг собиқ бош қўмондони, ҳозирда Буюк Британиядаги элчи Валерий Залужний қайд этилган.
Кейинги ўринларни собиқ мудофаа вазири Михаил Федоров (13,1 фоиз), президент офиси раҳбари Кирилл Буданов (8,3 фоиз) ва собиқ президент Пётр Порошенко (6,1 фоиз) эгаллаган.
Сўровнома натижаларига кўра, иккинчи турда Залужний Зеленский устидан катта устунлик билан ғалаба қозонади. Овоз беришда иштирок этишини билдирган ва танловини аниқлаган респондентлар орасида Залужний 66,2 фоиз, Зеленский эса 33,8 фоиз овоз тўплайди.
Шунингдек, агар иккинчи турга Михаил Федоров ёки Кирилл Буданов чиқса, улар ҳам Зеленскийни ўхшаш фарқ билан мағлуб этиши мумкинлиги қайд этилган. Фақат Пётр Порошенко билан эҳтимолий баҳсда Зеленский устунликка эга бўлади.
Парламент сайловлари бўлиб ўтган тақдирда эса шартли равишда шакллантирилган Залужний блоки 19,4 фоиз, Федоров блоки 17,9 фоиз овоз тўплаши мумкин. «Халқ хизматкори» партияси эса 12,7 фоиз билан учинчи ўринни эгаллаган.
Тадқиқот шунингдек, респондентларнинг 62,5 фоизи Михаил Федоровнинг мудофаа вазири лавозимидан озод этилишини қўллаб-қувватламаганини кўрсатди. Шу билан бирга, иштирокчиларнинг аксарияти Қуролли кучлар бош қўмондони Александр Сирскийнинг лавозимдан кетишини маъқуллаган.
SOCIS сўровномаси 28 июл — 2 август кунлари Украина ҳукумати назоратидаги, фаол жанговар ҳаракатлар олиб борилмаётган ҳудудларда истиқомат қилувчи 2 минг нафар вояга етган фуқаро ўртасида ўтказилган. Тадқиқотнинг эҳтимолий хатолик даражаси ±2,6 фоизни ташкил этади.
