Америка етакчиси Эрон вакиллари сўнгги беш ойлик ҳарбий можарода мамлакатга етказилган зарарни қоплашни талаб қилаётганини таъкидлади. Трампнинг айтишича, бу масала музокаралар ёки учрашувларда «ҳеч қачон тилга олинмаган».
«Энди мен Эрондан йўл четига ўрнатилган бомбалар ёрдамида ўлдирилган ва оғир яраланган барча одамлар учун товон тўлашни талаб қиламан», деб ёзди Трамп Truth Social ижтимоий тармоғида.
АҚШ президенти, шунингдек, USS Cole кемасида ҳалок бўлганларнинг оиласини ва жанговар ҳаракатларда қурбон бўлган «бошқа минглаб» одамларни ҳам тилга олди. Бундан ташқари, у Эрон «сўнгги 50 йил ичида ўлдирган» намойишчиларнинг оиласига, шунингдек, сўнгги беш ой ичида ҳалок бўлган 52 минг кишининг яқинларига ҳам товон пули тўланиши кераклигини айтди.
«Мен ўз вакилларимга Эрон билан келажакдаги ҳар қандай музокараларга ушбу талабни киритишни қатъий топширдим», деб таъкидлади АҚШ президенти.
Эрон Ҳўрмуз бўғозининг эҳтимолий очилишини АҚШ томонидан бир қатор шартларнинг бажарилишига, жумладан, Эронга етказилган зарарни тўлиқ қоплашига боғлади. Бу ҳақда 8 август куни Эрон Миллий хавфсизлик олий кенгаши котиби Муҳаммад Боқир Зулқадр маълум қилди, деб хабар беради ISNA агентлиги.
Унинг сўзларига кўра, Вашингтон Теҳронга нисбатан сиёсатини ўзгартирмагунча, бўғоз очилмайди. Зулқадр Эрон томонининг фикрича, Қўшма Штатлар томонидан бажарилиши лозим бўлган олтита талабни санаб ўтди.
Зарарни қоплашдан ташқари, Эрон ўзига нисбатан ҳар қандай таҳдид ва диний қадамжоларни ҳақоратлашни тўхтатишни, Ливан, Фаластин, Яман ва Ироқда Эрон ва унинг иттифоқчиларига қарши ҳарбий ҳаракатларни бутунлай тугатишни, денгиз блокадасини бекор қилиб, АҚШ ҳарбий-денгиз ва ҳарбий-ҳаво кучларини олиб чиқиб кетишни, санкцияларни бекор қилишни ва музлатилган Эрон активларини блокдан чиқаришни талаб қилди.
