Нашр бу ҳақда Украинага лицензия беришни қўллаб-қувватловчи АҚШ Конгресидаги республикачи сиёсатчилардан бирига таяниб хабар берган.
Унинг айтишича, Америка мудофаа компаниялари ўз эътирозларини расман интеллектуал мулк ўғирланиши ва технологияларнинг учинчи томонларга берилиши хавфи билан изоҳлаши мумкин. Бироқ масаланинг яна бир жиҳати Украинанинг Patriot учун ракета ишлаб чиқариш жараёнини такомиллаштириб, уларни катта ҳажмда ва нисбатан арзон ишлаб чиқариш имконияти билан боғлиқ.
Зеленский: Ҳозир қоғозбозлик билан оворамиз
Украина президенти Володимир Зеленский 8 август куни урушнинг биринчи йилидаёқ ўша пайтдаги АҚШ президенти Жо Байдендан Patriot тизимларини ишлаб чиқаришга доир лицензияларни беришни сўраганини айтди.
Зеленскийнинг таъкидлашича, ҳозир Доналд Трамп билан тегишли лицензияларни бериш бўйича келишувга эришилган. Шу билан бирга, у бундай имконият Украинага тўрт йил аввал берилганида вазият бошқача бўлиши мумкинлигини қайд этган.
Украина раҳбари ҳозир бу масалада бюрократик жараёнлар давом этаётганини танқид қилди. Унинг сўзларига кўра, Украинага ҳақиқий ракеталар учиб келаётган бир пайтда лицензиялар бўйича ҳужжатларни расмийлаштириш жараёни вақт талаб қилмоқда.
Зеленский Европа давлатлари билан ҳам айрим ҳарбий технологиялар ва қурол-яроғларга лицензия олиш масаласи анчадан бери муҳокама қилинаётганини билдирди.
Лицензия масаласи Байден маъмурияти даврида ҳам кўтарилган
The Kyiv Independent журналисти Тим Задорожнийнинг маълум қилишича, Зеленский Patriot лицензиялари масаласини Байден маъмуриятининг ҳокимиятдаги сўнгги ойларида илгари сурган.
The Atlantic маълумотларига кўра, Украинанинг юқори лавозимли амалдорлари бу таклифни ўша пайтдаги АҚШ мудофаа вазири Ллойд Остин ва президентнинг миллий хавфсизлик масалалари бўйича маслаҳатчиси Жейк Салливанга тақдим этган бўлиши мумкин. Бироқ Киевнинг таклифи сабаблари тушунтирилмаган ҳолда рад этилган.
Нашрнинг ёзишича, Украина Patriot учун ракеталарни ўз эҳтиёжидан ортиқ миқдорда ишлаб чиқариш имкониятига ҳам эга бўлиши мумкин. Бундай ракеталар кейинчалик АҚШ эҳтиёжлари учун ишлатилиши ёки Вашингтоннинг иттифоқчилари ва ҳамкорларига сотилиши мумкин.
The Atlantic айнан шу имконият Америка томонидаги хавотирларнинг сабабларидан бири бўлиши мумкинлигини қайд этган.
Трамп: Ракеталар ўзимизга ҳам керак
АҚШ президенти Доналд Трамп 6 август куни журналистларнинг Вашингтон Украинага Patriot мажмуалари учун қўшимча тутиб қолувчи ракеталар ва Киев талаб қилаётган узоқ масофали ракеталарни тақдим этадими, деган саволига жавоб берди.
Трамп АҚШнинг ўзига ҳам ракеталар кераклигини айтган.
Шунингдек, у собиқ президент Жо Байден маъмуриятини Украинага катта ҳажмда ҳарбий ёрдам бериб, АҚШнинг ўқ-дори захираларини камайтириб юборганликда айблади.
Трампнинг таъкидлашича, у биринчи президентлик муддатини якунлаган вақтда АҚШнинг ўқ-дори захиралари тўла бўлган, кейинчалик эса уларнинг катта қисми Украинага берилган. Ҳозир Вашингтон ушбу захираларни қайта тиклашга ҳаракат қилмоқда.
Шу тариқа, Patriot ракеталарини Украинада ишлаб чиқариш учун лицензия бериш масаласи нафақат Киевнинг ҳаво ҳужумидан мудофаа имкониятларини кучайтириш, балки Америка мудофаа саноати манфаатлари, технологияларни ҳимоя қилиш ва АҚШнинг ўз ҳарбий захираларини тўлдириш масалалари билан ҳам боғланмоқда.
