«Евровидение» ташкилотчиси — Европа телерадиоэшиттириш иттифоқи (EBU) 12 август куни халқаро қўшиқ танлови қоидалари янгиланганини маълум қилди.
Янги тартибга кўра, «Евровидение»да ғолиб чиққан давлат одатдагидек кейинги танловни ўтказиш ҳуқуқини қўлга киритади. Бироқ ушбу мамлакат ёки унга бевосита туташ ҳудудда қуролли можаро ёхуд мураккаб геосиёсий вазият хавфсизликка жиддий таъсир кўрсатаётган бўлса, мезбонлик ҳуқуқи автоматик тарзда кафолатланмайди.
Зарурат туғилганда EBU ғолиб давлат жойлашган ҳудуддаги хавфсизлик даражасини мустақил баҳолашни ташкил қилиши мумкин.
Баҳолаш натижаларидан сўнг EBU «Евровидение»нинг ижроия органи ҳисобланган Референт гуруҳ билан биргаликда ғолиб мамлакат телерадиокомпанияси танловни хавфсиз шароитда ўтказа олиш ёки олмаслигини ҳал қилади.
Агар мезбон телерадиокомпания хавфсиз танлов ўтказиш имкониятига эга эмас, деган хулосага келинса, EBU «Евровидение»ни ташкил қилиш учун бошқа телерадиокомпанияни танлайди.
Украина мисолида бу тартиб амалда қўлланган
Аслида бундай ёндашув аввал ҳам амалиётда қўлланган. 2022 йилда Украина «Евровидение» ғолиби бўлган, аммо Россиянинг Украинага қарши кенг кўламли уруши сабаб 2023 йилги танловни Украинада ўтказиш имкони бўлмаган.
Натижада «Евровидение-2023» Буюк Британияда ташкил этилган. Яъни хавфсизлик сабаб ғолиб мамлакатдан мезбонлик ҳуқуқини бошқа давлатга ўтказиш амалиёти мавжуд эди, аммо энди бу қоида расман танлов низомига киритилди.
2026 йилги «Евровидение»да эса Яқин Шарқдаги можаро кескинлашган бир пайтда Исроил вакили иккинчи ўринни эгаллаган.
Асосий вокал жонли ижро этилиши шарт
EBU танловда фонограмма ва олдиндан ёзиб олинган овозлардан фойдаланиш қоидаларига ҳам аниқлик киритди.
Янги талабларга мувофиқ, асосий хонанда ёки хонандалар ўз партиясини жонли ижро этиши шарт. Фонограмма ва олдиндан ёзиб олинган айрим элементлардан белгиланган қоидалар доирасида фойдаланишга рухсат берилади.
Бироқ бундай ёзувлар асосий жонли вокал ўрнини босиши ёки уни ҳаддан ташқари кучайтириши мумкин эмас. Асосий мелодияни ижро этадиган вокал жонли бўлиб қолиши керак.
«Евровидение» иштирокчилари камида 18 ёшда бўлади
Танлов иштирокчилари учун ёш чегараси ҳам ўзгартирилди. Аввал «Евровидение»да 16 ёшга тўлган санъаткорлар иштирок этиши мумкин эди.
Янги қоидага кўра, барча ижрочилар биринчи репетиция ўтказиладиган кунга қадар 18 ёшга тўлган бўлиши шарт.
Ташкилотчилар бу ўзгариш ёш санъаткорларнинг хавфсизлигини кучайтириш ва уларни «Евровидение» каби йирик халқаро танловда иштирок этиш билан боғлиқ кучли босимдан ҳимоя қилиш чораларининг давоми эканини таъкидлаган.
Янгиланган қоидалар 2027 йилдан амал қила бошлайди. Навбатдаги танлов Болгарияда ўтказилиши режалаштирилган. Мамлакатга «Евровидение»даги тарихий ғалабани 2026 йил май ойида Dara Bangaranga композицияси билан олиб келган.
