Володимир Зеленский бу ҳақда 11 сентябр куни Канада бош вазири Марк Карни билан ўтказилган музокаралардан сўнг журналистларга маълум қилди.

Украина президентининг сўзларига кўра, АҚШ делегацияси билан навбатдаги учрашув Ню-Йоркда БМТ Бош ассамблеяси доирасида ўтказилиши мумкин.

Зеленский музокараларда дон ва бошқа қишлоқ хўжалиги маҳсулотларини экспорт қилиш масаласига алоҳида эътибор қаратилишини айтди. Унинг таъкидлашича, Россия Қора денгиз орқали Украина қишлоқ хўжалиги маҳсулотлари экспортига тўсқинлик қилишни бошлаган.

Шу билан бирга, Украина раҳбари Киевнинг Европа, Канада ёки АҚШ билан музокаралари фонида Россия Украинага ҳужумларни кучайтириши мумкинлигини билдирди.

«Россияни билган ҳолда айтишим мумкинки, улар бизнинг европаликлар, канадаликлар ёки америкаликлар билан қаердадир музокара олиб бораётганимизни эшитса, бизга қарши ҳужумларни кучайтиришга ҳаракат қилади. Бу музокаралар ёки ҳар қандай мулоқотни бузиш учун қилинади. Аммо биз бу йўналишда ҳаракат қилишда давом этамиз. Урушни тўхтатишнинг бошқа йўли йўқ», — деди Зеленский.

Унинг айтишича, Россия кучларининг Украина инфратузилмасига зарбалари давом этаётган бир шароитда Киев энергетика хавфсизлиги масалалари бўйича АҚШ делегацияси билан ҳар куни алоқада бўлиб турибди.

Зеленский, шунингдек, Россияда 18–20 сентябр кунлари ўтказилиши режалаштирилган Давлат думаси сайловларига қадар Москва билан жиддий музокаралар бошланишини кутмаётганини билдирди.

Аввалроқ Вашингтон ҳам Россиядаги сайлов кампанияси якунланганидан кейин музокара жараёни қайта фаоллашишига умид қилаётгани хабар қилинган эди.

АҚШ президенти Доналд Трамп эса 9 сентябр куни Россия президенти Владимир Путин билан телефон орқали мулоқот қилганидан сўнг, Путин Украинадаги урушни тугатиш бўйича келишувга эришишга тайёр эканини айтган.

«Бизда жуда яхши суҳбат бўлди. У келишувни хоҳлаяпти», — деган Трамп. АҚШ президенти, шунингдек, Володимир Зеленский ҳам келишувга эришишни истаса, бу «жуда яхши» бўлишини таъкидлаган.

Сентябр бошида Вашингтон Киев ва Москва ўртасида музокараларни қайта бошлаш мақсадида воситачилик ҳаракатларини яна фаоллаштирган. АҚШ президентининг махсус вакили Стив Уиткофф ва Трампнинг куёви Жаред Кушнер Москвага навбатдаги ташрифини амалга оширганидан сўнг Кремл Путин Трампни Европага нисбатан ҳеч қандай «тажовузкор режалари» йўқлигига ишонтирганини маълум қилган.