16 август, якшанба куни Киевда Михаил Федоровни Украина мудофаа вазири лавозимига тиклашни талаб қилган оммавий акциялар давом этди. Украина ОАВ маълумотларига кўра, бу каби намойишлар кетма-кет 32 кундан бери ўтказилмоқда.
«Интерфакс-Украина» агентлиги тадбирни «мудофаа соҳасида мулоқот ва ислоҳотларни қўллаб-қувватлаш акцияси» деб атаган.
Намойишчилар Киев марказида жойлашган Украина халқи Озодлик аркаси олдида тўпланган. Шундан сўнг улар Хрешчатик, Осмон юзлиги қаҳрамонлари хиёбони ва Олгинская кўчаси бўйлаб юриш ўтказган.
Акция якунида президент офиси биноси яқинидаги Иван Франко майдонида митинг ташкил этилган. Oboz.ua нашрига кўра, намойишчилар колоннаси пойтахтнинг марказий кўчалари бўйлаб юзлаб метрга чўзилган.
Намойишчилар нимани талаб қилмоқда?
Журналистларнинг қайд этишича, акцияда турли ёшдаги фуқаролар иштирок этган, аммо улар орасида ёшлар кўпчиликни ташкил қилган.
Намойишчиларнинг асосий талаби — Михаил Федоровни Украина мудофаа вазири лавозимига қайтариш.
Шу билан бирга, акция иштирокчилари президент Володимир Зеленскийнинг бошқа сўнгги кадрлар бўйича қарорларига ҳам норозилик билдирган.
Хусусан, улар собиқ мудофаа вазири Рустем Умеровнинг Украина Ташқи разведка хизмати раҳбари этиб тайинланиши ҳамда Миколайив вилояти ҳарбий маъмуриятининг собиқ раҳбари Виталий Кимнинг Украина фахрийлар ишлари вазири лавозимига тайинланишини танқид қилган.
Намойишларда Федоровни қўллаб-қувватловчи, ҳукуматни жамият билан очиқ мулоқот қилишга ва мамлакатнинг Европа йўналишини давом эттиришга чақирувчи шиорлар янграган.
Намойишлар бошқа шаҳарларда ҳам ўтказилди
Украинанинг NV нашри маълумотларига кўра, шунга ўхшаш акциялар фақат Киев билан чекланмаган.
Федоровни қўллаб-қувватлаш намойишлари Лвив, Днипро, Луцк, Ровно, Полтава, Одесса, Винница, Хмелницкий ва Черновци шаҳарларида ҳам ўтказилган.
Киевда эса акция иштирокчилари президент офиси вакилига Володимир Зеленский номига тайёрланган петицияни топширган.
Украина ОАВ маълумотларига кўра, ҳужжатда Михаил Федоров мудофаа вазири бўлган даврда бошланган ислоҳотларни давом эттириш ҳамда мамлакат раҳбариятини жамият билан кенгроқ мулоқот ўрнатишга чақириш талаблари ўрин олган.
«Украинская правда» хабар беришича, намойиш ташаббускорларидан бири, уруш фахрийси Дмитрий Козятинский акцияда сўзга чиқиб, Украинада ҳануз мудофаа ва ташқи ишлар вазирлари тайинланмаганига эътибор қаратган.
