БМТнинг Инсон ҳуқуқлари бўйича олий комиссари Фолкер Тюрк 19 август куни «Яблоко» партияси раиси ўринбосари Лев Шлосбергга нисбатан чиқарилган ҳукмдан хавотирда эканини маълум қилди.
Шлосберг Россиянинг Украинага қарши урушига очиқчасига қарши чиқиб келган сиёсатчилардан бири бўлиб, суд томонидан 11 йилга озодликдан маҳрум этилган.
Фолкер Тюрк Россияни «фикр эркинлигини, шунингдек, фуқароларнинг сайлов жараёнида тўлақонли ва эркин иштирок этиш ҳуқуқини ҳурмат қилишга» чақирди.
«Тинч норозилик ҳеч қандай ҳолатда жиноий ҳаракатга айлантирилмаслиги керак», — дея таъкидлади БМТ олий комиссари.
Бундан аввал БМТ Россия расмийларининг «Яблоко» партиясини Давлат думаси сайловларида иштирок этишдан четлатиш қарорини ҳам қоралаган эди. Манбада «Яблоко» Россиянинг Украинага қарши урушини тезроқ тугатиш тарафдори бўлиб келаётган ягона партия сифатида қайд этилган.
Шлосберг нима учун судланди?
Псков шаҳар суди икки кун аввал Лев Шлосбергни Россия Қуролли кучларини такроран «обрўсизлантириш» ва Украинадаги кенг кўламли уруш ҳақида «ёлғон маълумот» тарқатишда айбдор деб топган.
Қуролли кучларни «обрўсизлантириш» бўйича ишга сиёсатчининг тарихчи Юрий Пивоваров билан ўтказган дебатлари ёзуви сабаб бўлган. Ушбу баҳс давомида Шлосберг ҳарбий ҳаракатларни имкон қадар тезроқ тўхтатиш зарурлигини ҳимоя қилган.
«Ёлғон маълумот» тарқатиш бўйича жиноий иш эса Шлосбергнинг Telegram-каналида «Эхо Москвы» материалини қайта тарқатиши билан боғлиқ. Унда Британиянинг Daily Mirror газетаси биринчи саҳифаси акс этган бўлиб, муқовада қонга беланган аёл ва Россия президенти Владимир Путиннинг сурати жойлаштирилган эди.
Лев Шлосберг Россияда қолиб, урушга қарши позициясини очиқ билдириб келаётган таниқли сиёсатчилардан бири ҳисобланади.
«Яблоко» партияси маълумотларига кўра, Украинада кенг кўламли уруш бошланганидан буён партия офислари ва унинг фаоллари билан боғлиқ жойларда камида 40 марта тинтув ва биноларни кўздан кечириш тадбирлари ўтказилган. Шунингдек, партиянинг 36 аъзосига нисбатан армияни «обрўсизлантириш» бўйича жами 45 та маъмурий баённома расмийлаштирилган.
