Хорватия суди 20 август куни «Шимолий оқим» ва «Шимолий оқим-2» газ қувурларини портлатишга алоқадорликда гумон қилинаётган украиналик ғаввос Владимир Ж.ни ҳибсда сақлаш тўғрисида қарор чиқарди.
У мазкур иш бўйича аниқланган иккинчи гумондор ҳисобланади. Хорватия расмийлари Германиянинг уни экстрадиция қилиш ҳақидаги сўровини кўриб чиқаётган вақтда Владимир Ж. ҳибсда қолади.
AFP агентлиги маълумотига кўра, судья эҳтиёт чорасини танлашда гумондорнинг қочиб кетиш хавфи мавжудлигини асос қилиб кўрсатган.
ОАВ: гумондор филм суратга олиш майдончасида ушланган
Legal Tribune Online портали маълумотига кўра, украиналик Ҳолливуднинг Snake Island филми суратга олинаётган майдончада қўлга олинган. Америкалик режиссёр Даг Лайман суратга олаётган филм сюжети «Шимолий оқим» газ қувурларидаги портлашлар билан боғлиқ воқеаларга асослангани айтилмоқда. Унда Эдриан Броуди ва Шон Пенн каби актёрлар иштирок этмоқда.
Der Spiegel нашрининг тасдиқланмаган маълумотларига кўра, Владимир Ж. фильм ижодий гуруҳида маслаҳатчи сифатида ишлаган.
У бир йил аввал Полшада ҳам қўлга олинган эди. Бироқ ўшанда Полша суди уни Германияга экстрадиция қилишни рад этган.
«Шимолий оқим» портлашлари бўйича биринчи гумондор — Украина фуқароси Сергей К. ҳозир Германияда ҳибсда сақланмоқда. У 2025 йил августда Италиядан Германияга экстрадиция қилинган.
Германия Федерал прокуратураси Сергей К.га фуқаролик энергетика инфратузилмасига ҳужум қилиш билан боғлиқ айбловлар қўйган. Тергов версиясига кўра, у газ қувурларини портлатишда иштирок этган диверсия гуруҳига раҳбарлик қилган.
«Шимолий оқим»даги портлашлар
«Шимолий оқим» ва «Шимолий оқим-2» газ қувурларининг Болтиқ денгизи тубидан ўтган тўрт тармоғидан учтаси 2022 йил сентябр ойи охирида портлашлар оқибатида ишдан чиққан.
Ўша пайтда ушбу қувурларнинг ҳеч бири орқали газ етказиб берилмаётган эди. Россия «Шимолий оқим» орқали газ етказиб беришни портлашлардан сал олдин тўхтатган, «Шимолий оқим-2» эса Россиянинг Украинага кенг кўламли бостириб кириши ортидан умуман ишга туширилмаган.
2026 йил июл ойида Германия Федерал прокуратураси 2022 йилдаги «Шимолий оқим» ва «Шимолий оқим-2» портлашлари Украина давлат органларининг топшириғи билан ташкил этилган, деган хулосага келгани хабар қилинган.
