Ҳарри Кейн фаолиятида илк бор «Олтин тўп» қўлга киритди. «Бавария»нинг 33 ёшли ҳужумчиси ажойиб ўтган ва ўзи клуб ҳамда миллий жамоа сафида жами 73 гол урган мавсум учун ҳақли равишда тақдирланди. Энди уни дўстлари, жамоадошлари ва бошқа кўплаб машҳурлар табрикламоқда. Буюк Британия валиаҳд шаҳзодаси Уилям ҳам четда турмади. Аммо мукофот унга берилганидан норози бўлганлар ҳам топилади: масалан, овоз бериш якунларига кўра учинчи ўринни эгаллаган Ламин Ямалнинг амакиси мукофотни танқид қилди.
«Муваффақият сенинг шовқининг бўлсин»
Кейн овоз бериш якунларига кўра «Реал» ҳужумчиси Килиан Мбаппе ва «Барселона» вингери Ямални ортда қолдириб, сўнгги 25 йил ичида «Олтин тўп» қўлга киритган илк инглиз футболчиси бўлди. Унгача Англиянинг бу мукофотга лойиқ кўрилган охирги вакили Майкл Оуэн (2001 йил) бўлиб турганди.
Ҳарри совринни Лондондаги «Палладиум» театрида ушбу мукофотнинг икки карра ғолиби, бразилиялик Роналдодан қабул қилиб олди. Саҳнага чиққанида унинг қўллари қалтираётганди – бу лаҳзалар у учун қанчалик қадрли экани кўриниб турарди. Кейн ташкилотчиларга, ўзи учун овоз берган журналистларга, «Бавария» ва Англия миллий жамоасидаги жамоадошларига миннатдорчилик билдирди. У Венсан Компани номини алоҳида тилга олиб, унинг тезда соғайиб кетишини тилади (мюнхенликлар устози шу кунларда шифохонага тушиб қолган). Шунингдек, Англия миллий жамоаси устози Томас Тухелга ҳам раҳмат айтди (инглизлар унинг бошқарувида 2026 йилги жаҳон чемпионатида бронза медалларни қўлга киритди).
Форвард ўз фаолиятини бошлаган «Тоттенҳэм»ни ҳам ёддан чиқармади. Аммо унинг нутқидаги энг ҳиссиётли қисми яқинларига бағишланди: Кейн болалигида акаси Чарли билан кўчада тўп тепганини эслади ва ота-онасига қўллаб-қувватлов учун миннатдорчилик изҳор этди. Шунингдек, ўзи билан кўп дамларни бирга кечирган рафиқаси Кейтга юзланди – улар мактаблик давридан таниш.
«Рафиқам – менинг энг яхши дўстим. Биз кўтарилишлар ва тушишлардан биргаликда ўтдик. Сен – менинг асосий таянчимсан. Менимча, бу мукофотни мендан ҳам кўпроқ хоҳлагандинг. Орзуларим ушалиши учун сен доим ўзингни қурбон қилгансан. Бугун бу мукофотни биргаликда нишонлаймиз. Сен билан. Сени севаман», – деган ҳужумчи.
Маросимдан кўп ўтмай Кейн ижтимоий тармоқдаги саҳифасида шундай пост қолдирди: «Жимгина меҳнат қилишда давом эт. Муваффақият сенинг шовқининг бўлсин».
Айрим мухлислар бу сўзларда унинг «Олтин тўп» учун асосий рақобатчилари, сўнгги ҳафталар давомида очиқчасига мукофотга ўзи лойиқ эканини таъкидлаб келган Ямал ва Мбаппега нозик ишорани кўришди.
