Латвия Марказий статистика бошқармаси 20 август куни Россия ва Беларус билан савдо қилишда давом этаётган маҳаллий компаниялар рўйхатини биринчи марта эълон қилди.
Рўйхатдан Россия ва Беларусга маҳсулот экспорт қилаётган ёки ушбу давлатлардан товар импорт қилаётган 170 га яқин Латвия компанияси жой олган.
Шу билан бирга, рўйхатга киритилган компаниялар халқаро санкцияларни бузаётгани англатилмайди. Улар чекловлар татбиқ этилмайдиган соҳаларда Россия ва Беларус билан қонуний равишда савдо қилиши мумкин. Бунга, масалан, айрим озиқ-овқат маҳсулотлари ва дори воситалари савдоси киради.
Маълум қилинишича, Россия ва Беларус билан бизнес юритаётган Латвия компанияларининг очиқ реестри бундан буён ҳар ой янгилаб борилади.
Айрим маҳаллий оммавий ахборот воситалари мазкур реестрни «шармандали рўйхати» деб атаган.
Компаниялар ҳақидаги маълумотларни ошкор қилиш июн ойида Украина тинч аҳолисини қўллаб-қувватлаш тўғрисидаги қонунга киритилган ўзгартишлардан сўнг мумкин бўлди. Бунга қадар Россия ва Беларус билан савдо қилаётган маҳаллий компаниялар ҳақидаги бундай маълумотлар жамоатчилик учун очиқ эмас эди.
Эндиликда истеъмолчилар, бизнес ҳамкорлар ва бошқа компаниялар Россия ёки Беларус билан савдони давом эттираётган фирмалар ҳақида очиқ маълумот олишлари мумкин. Бу уларга реестрга киритилган компаниялар билан ҳамкорликни давом эттириш ёки эттирмаслик бўйича мустақил қарор қабул қилиш имконини беради.
Латвия Украинага яқин сиёсий ҳамкорлардан бири ҳисобланади. Россиянинг Украинага қарши кенг кўламли уруши бошланганидан кейин Рига Россия ва Беларус товарлари импортига қатор чекловлар киритган.
Бундан ташқари, кўплаб Латвия компаниялари Россия ва Беларус билан савдо алоқаларини ихтиёрий равишда тўхтатган ёки сезиларли даражада қисқартирган.
