24–30 август кунлари Ўзбекистонда иссиқлик бироз чекинади. Бироқ ҳафта охирига бориб ҳарорат яна кўтарилиши кутилмоқда. Бу шароит қишлоқ хўжалиги учун нисбатан енгиллик берса-да, жануб ва чўл ҳудудларида жазирама ҳамда қуруқ ҳаво таъсири сақланиб қолади.
Ҳафта давомида кутилаётган об-ҳаво билан иқлимшунос Эркин Абдулаҳатов таништиради.
Қишлоқ хўжалигига таъсир
Ҳафтанинг биринчи ярмида кундузи +35…+38 ҳамда тунлари +17…+22 даража бўлиши кутилаётган ҳарорат ўсимликлар учун ўтган ҳафтага нисбатан енгилроқ шароит яратади. Аммо Сурхондарё, Қашқадарё, Бухоро–Навоий чўллари ва Қизилқумда +40 даражагача иссиқлик намлик танқислигини кучайтириши мумкин. Шунинг учун экинларни суғориш ва тупроқ намлигини сақлашга эътибор бериш зарур.
Кучли шамол ва чанг-тўзонлар тупроқ намлигининг буғланишини тезлаштириб, экинларга қўшимча стресс юклаши мумкин. Ҳафта охирида иссиқликнинг қайта кучайиши сабабли август охирида экинларнинг сувга эҳтиёжи ҳали юқори бўлиб қолади.
Аҳоли саломатлигига таъсир
Ҳафта боши ва ўртасида ҳароратнинг пасайиши инсон учун ўтган ҳафтадаги кучли иссиқликка нисбатан сезиларли енгиллик беради. Тунги +17…+22 даража организмнинг ортиқча иссиқлик юкидан халос бўлиши учун қулайроқ шароит яратади.
Бироқ жануб ва чўл ҳудудларида +40 даражагача иссиқлик сақланиши сабабли куннинг энг иссиқ пайтларида очиқ ҳавода узоқ қолиш ва оғир меҳнат қилишдан сақланиш лозим. Ҳафта охирида иссиқликнинг қайта кучайиши билан термик юк ҳам ортади.
Умуман олганда, ҳафта қишлоқ хўжалиги ва аҳоли учун нисбатан енгилроқ бошланади, аммо август охирида иссиқлик ҳали чекинмайди.
